بۇگىنگىدەي ۋاقىتتىڭ قيىندىعى ورىن الىپ وتىرعانىنا قاراماستان، مەملەكەت باسشىسى قاسىم-جومارت توقايەۆ پارلامەنت پالاتالارىنىڭ بىرلەسكەن وتىرىسىندا «حالىق بىرلىگى جانە جۇيەلى رەفورمالار – ەل وركەندەۋىنىڭ بەرىك نەگىزى» اتتى قازاقستان حالقىنا جولداۋىن جاسادى.
ەل يەسىنىڭ ءار سوزىنە ەرەكشە ءمان بەرەتىن حالقىمىز جىل سايىن ومىرىمىزدە، وڭىرىمىزدە قانداي جاڭالىق، نەندەي وزگەرىس بولادى دەپ ەلەڭدەپ وتىراتىنى راس. جاسىراتىنى جوق، مادەنيەت سالاسىنىڭ قىزمەتكەرلەرى مەن ارداگەرلەرى الدىمەن ءوز جاعدايلارىنا كوڭىل بولىنگەنىن قالايدى.
««2022 جىلدان باستاپ مۋزەي قىزمەتكەرلەرى مەن كىتاپحاناشىلاردىڭ جالاقىسى وسەدى»، - دەپ مالىمدەدى مەملەكەت باسشىسى.
دۇرىس. مادەنيەتتى، رۋحاني سۋسىن بولاتىن جاقسى دۇنيەلەردى ۇمىت قالدىرماعان ءجون. كينونىڭ، تەاتردىڭ ارداگەرلەرىن دارىپتەپ وتىرۋ ءلازىم. ۇلتىمىز جاڭا ساپاعا كوشۋى ءۇشىن كۇندەلىكتى ومىرلىك ۇستانىمىمىز دا وزگەرىس بولۋى كەرەك.قازاق قوعامىندا ۇلتتىق جاڭا قاعيداتتار، جاڭا باعدارلار سالتانات قۇرۋعا ءتيىس. ونەر ادامىنىڭ ءومىرى مەن كىلەڭ تارتىس پەن قينالىستان تۇراتىن تاعدىرى، تاجىريبەسى كەيىنگىگە ۇلگى بولعانى ىزگى. ول ءۇشىن ونەر ابىزدارىنىڭ كۇندەلىكتەرىن، ولار جايىندا جازىلعان دەرەكتى كىتاپتاردى كوپتەپ شىعارعان دۇرىس.
جولداۋدا وسى ماسەلەلەردىڭ ءبارى كەڭىنەن ءسوز بولدى. ەندى ولاردى ءتيىستى جاۋاپتى مينيسترلىكتەر مەن ۆەدومستۆولار جۇزەگە اسىرسىن. كەلەر جىلدان باستاپ بيۋدجەت سالاسى قىزمەتكەرلەرى جالاقىسىنىڭ 20 پايىزعا وسەتىنى تۋرالى جاعىمدى جاڭالىق تا جوق ەمەس. سول مول قارجى ءتيىستى، كوزدەلگەن ماقساتقا پايدالانىلسا، قۇبا-قۇپ بولار ەدى.