گرەك-ريم كۇرەسىنىڭ وكىلى ماقسات ەرەجەپوۆتىڭ سوڭعى ۋاقىتتا جارىستارعا قاتىسپاي ءجۇرۋىنىڭ سەبەبى انىقتالدى. تانىمال بالۋان كارەراسىن اياقتاپ، سپورت فۋنكسيونەرى اتانۋ تۋرالى شەشىم قابىلداعان، دەپ حابارلايدى اlmaty-akshamy.kz.
2 مامىر كۇنى ول قوستانايدا ۆلاديمير ماتۆيەنكو اتىنداعى بالالار-جاسوسپىرىمدەر وليمپيادالىق رەزەرۆ مەكتەبىنە باسشى بولىپ تاعايىندالدى.
سوڭعى رەت ەرەجەپوۆ بوزكىلەمگە 2023 جىلعى 29 جەلتوقساندا شىقتى. سول كۇنى ول اتىراۋدا وتكەن «مۇنايلى استانا كۋبوگى» حالىقارالىق تۋرنيرىندە توپ جاردى.
ماقسات ەرەجەپوۆ 1990 جىلى رۋدنىيدا تۋعان. ءبىراق جارىستارعا اتىراۋ وبلىسىنىڭ اتىنان قاتىستى.
كارەراسىنداعى باستى جەتىستىكتەرى: كادەتتەر اراسىندا ازيا چەمپيونى (2007 - 69 كگ)، جاسوسپىرىمدەر اراسىندا ازيا چەمپيونى (2010 - 74 كگ)، ازيا چەمپيوناتىنىڭ ءتورت دۇركىن قولا جۇلدەگەرى (2012 - 84 كگ، 2013 - 74 كگ، 2018 - 77 كگ، 2019 - 82 كگ)، ازيا چەمپيوناتىنىڭ ەكى رەت ءفيناليسى (2014 - 71 كگ، 2022 - 77 كگ)، ازيا چەمپيونى (2017 - 75 كگ)، اسكەريلەر اراسىنداعى الەم چەمپيوناتىنىڭ قولا جۇلدەگەرى (2018 - 77 كگ). ق ر سپورت شەبەرى، ازيادا قاتىسۋشىسى (2014، 71 كگ – سەگىزىنشى ورىن).