برازيليانىڭ وڭتۇستىگىندە توقتاۋسىز جاڭبىر جاۋىپ، مۇنىڭ سوڭى تاسقىنعا ۇلاستى.
سالدارىنان بوگەت ىستەن شىعىپ، 39 ادام وپات بولدى، دەپ حابارلايدى اlmaty-akshamy.kz. تاعى 70 كىسى ءىز-تۇزسىز كەتكەن. بۇل تۋرالى جەرگىلىكتى زاماتتىق قورعانىس اگەنتتىگى حابارلادى. ولاردىڭ سوزىنشە، بوگەتتىڭ بۇزىلۋىنان تولقىن دەڭگەيى 2 مەترگە دەيىن جەتكەن. بۇل سۋ باسقان ايماقتارعا قاتتى زاقىم كەلتىرىپ، 15 مىڭعا جۋىق تۇرعىن قونىسىن تاستاۋعا ءماجبۇر بولعان. ريو-گراندە-دۋ-سۋل شتاتىندا شامامەن 500 مىڭ ادام جارىقسىز جانە اۋىز سۋسىز وتىر. بۇل برازيلياداعى سوڭعى 80 جىلداعى ەڭ الاپات تاسقىن دەيدى ماماندار.
ەدۋاردو لەيتە، ريۋ-گراندي-دۋ-سۋل شتاتىنىڭ گۋبەرناتورى: - بۇل ايماق تاريحىندا بۇرىن-سوڭدى تىركەلمەگەن ەڭ اۋىر اپات. حالىق الاپات تاسقىنعا العاش رەت كۋا بولىپ وتىر.
تۇرعىنداردى ءقاۋىپسىز جەرگە كوشىرىپ جاتىر
تەحاستىڭ وڭتۇستىك-شىعىسىندا دا قولايسىز اۋا رايى تىركەلدى. قاتتى جاۋىن-شاشىن سالدارىنان حيۋستون قالاسىندا مەكتەپتەر ۋاقىتشا جۇمىسىن توقتاتتى. قوزعالىس شەكتەلىپ، جولدار جابىلدى. ال سان-حاسينتو وزەنىنىڭ دەڭگەيى 20 مەترگە جەتكەن. وزەن سۋى تاعى 3 مەترگە كوتەرىلۋى مۇمكىن. ۇلتتىق مەتەرەولوگيا قىزمەتى تاسقىن ءقاۋپى بارىن ەسكەرتتى. بيلىك تۇرعىنداردى شۇعىل ءقاۋىپسىز جەرگە كوشىرىپ جاتىر.
وستين دجۋنو، حيۋستون قالاسىنىڭ تۇرعىنى: - وزەن سۋى كوز الدىمىزدا تەز كوتەرىلىپ جاتىر. سوڭعى بىرنەشە ساعاتتا جولداردى سۋ باسىپ ۇلگەردى. ءقازىر كونرو كولىنە بوگەتتەردى اشىپ، ۇلكەن كولەمدە سۋ جىبەرىپ جاتىر. سول سەبەپتى تەز كوتەرىلۋدە.
تاسجول وپىرىلىپ، 48 ادام وپات بولدى
توقتاۋسىز جاۋعان جاڭبىردان كەيىن قىتايدىڭ وڭتۇستىگىندە تاس جولدىڭ ءبىر بولىگى وپىرىلىپ ءتۇستى. وقيعا گۋاندۋن پروۆينسياسىنىڭ مەيدا اۆتوجولىندا بولعان. تاس-تالقانى شىققان تاس جولدىڭ ۇزىندىعى شامامەن 18 مەترگە جەتەدى. 23 كولىك ءۇيىندى استىندا قالعان. 48 ادام مەرت بولدى، تاعى 30 كىسى جاراقات الدى. ايتا كەتەيىن، وڭىردە سوڭعى ەكى اپتادا رەكوردتىق دەڭگەيدە جاۋىن-شاشىن ءتۇسىپ، تاسقىن جۇرگەن.