ۇلى وتان سوعىسى ارداگەرلەرىن الەۋمەتتىك قولداۋ تۋرالى وڭىرلىك كوممۋنيكاسيالار قىزمەتىنىڭ بريفينگىندە الماتى قالاسى جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى باۋىرجان جاۋباسوۆ ايتىپ بەردى.
بۇگىندە الماتىدا ۇلى وتان سوعىسىنىڭ 43 ارداگەرى تۇرادى. ولارعا ماتەريالدىق قولداۋ كورسەتۋ ءۇشىن جىل سايىن 1 ملن تەڭگە مولشەرىندە ءبىرجولعى تولەم جۇزەگە اسىرىلادى.
«الماتى قالاسى اكىمىنىڭ تاپسىرماسىنا جانە ءماسليحات شەشىمىنە سايكەس بيىل ۇلى وتان سوعىسىنىڭ ارداگەرلەرىنە ۇلى وتان سوعىسىنداعى جەڭىس كۇنىنە قوسىمشا 1 ملن تەڭگە تولەنەدى. بارلىعى 2024 جىلى ولار 2 ملن تەڭگەدەن الادى»، - دەدى ب.جاۋباسوۆ.
وسىلايشا، 2024 جىلعى ۇلى وتان سوعىسىنداعى جەڭىس كۇنىنە وراي ءبىرجولعى الەۋمەتتىك كومەك تولەمدەرى بەلگىلەندى:
1. ۇوس ارداگەرلەرىنە – 2 ملن تەڭگە؛
2. ۇوس ارداگەرلەرىنە تەڭەستىرىلگەن ارداگەرلەرگە – 100 مىڭ تەڭگە؛
3. باسقا مەملەكەتتەردىڭ اۋماعىنداعى ۇرىس قيمىلداردىڭ ارداگەرلەرىنە – 100 مىڭ تەڭگە؛
4. اۋعانستانداعى نەمەسە سوعىس قيمىلدارى جۇرگىزىلگەن باسقا مەملەكەتتەردەگى ۇرىس قيمىلدارى كەزىندە قازا تاپقان اسكەري قىزمەتشىلەردىڭ وتباسىلارىنا – 100 مىڭ تەڭگە؛
5. قايتىس بولعان ۇوس ارداگەرىنىڭ ايەلىنە – 50 مىڭ تەڭگە؛
6. ەڭبەك مايدانىنا قاتىسۋشىلارعا – 50 مىڭ تەڭگە.
ۇلى وتان سوعىسىنىڭ ارداگەرلەرىنە اي سايىن 6،5 اەك (23 998 تەڭگە) مولشەرىندە، جانە كوممۋنالدىق قىزمەت تاريفتەرىنىڭ وسۋىنە بايلانىستى 0،8 اەك (2954 تەڭگە) مولشەرىندە اي سايىنعى الەۋمەتتىك كومەك تۇرلەرى كورسەتىلەدى. سونداي-اق، ۇوس ارداگەرلەرى:
- ساناتوريالىق-كۋرورتتىق ەمدەلۋگە تەگىن جولداما الۋعا؛
- قالالىق قوعامدىق كولىكتە (تاكسيدەن وزگە) تەگىن جۇرۋگە؛
- پروتەزدەۋ جانە پروتەزدىك-ورتوپەديالىق بۇيىمدارمەن (ستوماتولوگيالىق بۇيىمداردى قوسپاعاندا) تەگىن قامتاماسىز ەتىلۋگە؛
- ارناۋلى الەۋمەتتىك قىزمەتتەردىڭ كەپىلدىك بەرىلگەن كولەمىن (ۇيدە كۇتىم كورسەتۋ، مەديسينالىق-الەۋمەتتىك مەكەمەلەرگە جولداۋ) الۋدا باسىمدىلىققا؛
- امبۋلاتوريالىق-ەمحانالىق كومەك كورسەتەتىن جانە شۇعىل گوسپيتاليزاسيالاۋدى قامتاماسىز ەتەتىن ۇيىمداردا جەڭىلدەتىلگەن كومەك الۋعا قۇقىلى.