الماتىدا قوعامدىق كولىك جۇرگىزۋشىلەرى ءۇشىن قولايلى ەڭبەك جاعدايىن جاساۋعا باعىتتالعان جۇيەلى جۇمىس جالعاسىپ كەلەدى. قالادا 20 توقتاۋ-بۇرىلۋ الاڭىن (تبا) سالۋ جوسپارلانىپ وتىر.
جول ينفراقۇرىلىمىن دامىتۋ باسقارماسىنىڭ مالىمەتىنشە، اتالعان الاڭدار ءبىرقاتار ماڭىزدى مىندەتتى اتقارادى. اتاپ ايتقاندا، اۆتوبۋستاردىڭ جول جيەگىندە ءماجبۇرلى تۇردە توقتاپ تۇرۋىنىڭ الدىن الادى ءارى جۇرگىزۋشىلەردىڭ تولىققاندى دەمالۋىنا قاجەتتى جاعداي جاسايدى. بۇل ءوز كەزەگىندە، جولاۋشىلار تاسىمالىنىڭ قاۋىپسىزدىگىن ارتتىرۋعا ىقپال ەتەدى.
ءقازىر كوكتوبە شاعىناۋدانىندا ەكى مارشرۋتقا قىزمەت كورسەتەتىن، جالپى سانى 47 اۆتوبۋس شىعاتىن سوڭعى نۇكتە رەتىندە پايدالانىلاتىن توقتاۋ-بۇرىلۋ الاڭىنىڭ قۇرىلىسى تولىق اياقتالدى. الاڭ اۋماعىنا اسفالتبەتون جابىنى توسەلىپ، اۋماق بويىنا سىرتقى جارىقتاندىرۋ ورناتىلعان. سونىمەن قاتار جالپى اۋماعى 49 شارشى مەتر بولاتىن تاماقتانۋ ايماعى مەن سانيتارلىق-گيگيەنالىق بولمەسى بار جۇرگىزۋشىلەرگە ارنالعان مودۋلدىك دەمالىس عيماراتى بوي كوتەرەدى.
قالانىڭ ءارتۇرلى اۋداندارىندا بيىل پايدالانۋعا بەرىلەتىن تاعى ءۇش توقتاۋ-بۇرىلۋ الاڭىنىڭ قۇرىلىسى جۇرگىزىلىپ جاتىر. ال قالعان 16 الاڭ بويىنشا جوبالىق-سمەتالىق قۇجاتتامانى ازىرلەۋ قولعا الىنعان.