Almaty-akshamy.kz سايتىندا بۇگىن جارىق كورگەن جاڭالىقتارعا شولۋ.
ماڭعىستاۋدىڭ شەكاراسى كەڭەيەدى
"ماڭعىستاۋ وبلىسىنىڭ شەكاراسى مەن كاسپيي تەڭىزى اكۆاتورياسىنىڭ باستاپقى سىزىعى اراسىنداعى جالپى الاڭى 721 940،2365 گەكتار جەردى وبلىس اۋماعىنا قوسۋ ارقىلى ماڭعىستاۋ وبلىسىنىڭ شەكاراسى وزگەرتىلسىن"، - دەلىنگەن ۇكىمەتتىڭ قاۋلىسىندا.
تەمىرتاۋدا توتەنشە جاعداي
قاراعاندى وبلىسى مەن تەمىرتاۋ قالاسىنىڭ بىرنەشە اۋىلىندا جەرگىلىكتى اۋقىمداعى تابيعي توتەنشە جاعداي جاريالانۋى مۇمكىن. قۇجاتتاردىڭ جوبالارى "اشىق نقا" پورتالىندا پايدا بولدى.
10 قاڭتاردا تەمىرتاۋدا قاتتى بوران مەن جەلدىڭ سالدارىنان كەيبىر تۇرعىندار بايلانىسسىز قالدى. كوپتەگەن قالا تۇرعىندارى ۇيلەرىندە جارىق، جىلۋ جانە سۋدان ايىرىلدى.
الماتىدا قويمانىڭ 500-دەن استام شارشى مەترى جانىپ كەتتى
الماتى قالالىق توتەنشە جاعدايلار دەپارتامەنتىنىڭ مالىمەتىنشە، ءورت ءسوندىرۋ بارىسىندا قىزىپ تۇرعان تەمىر قويمادان ءقاۋىپسىز جەرگە 3 وتتەگى جانە 4 گاز باللونى شىعارىلدى. ءورت تۇنگى 22:34-تە وقشاۋلانىپ، 22:50-دە تولىق ءسوندىرىلدى. وعان 21 بىرلىك تەحنيكا مەن 100-دەن استام ادام جۇمىلدىرىلدى. وتتىڭ شىعۋ سەبەبى انىقتالىپ جاتىر. قازا بولعاندار مەن زارداپ شەككەندەر جوق.
سامات ابىشكە قاتىستى ءىستى تەرگەۋ اياقتالدى
ۇلتتىق قاۋىپسىزدىك كوميتەتى ءتوراعاسىنىڭ بۇرىنعى ءبىرىنشى ورىنباسارى سامات ابىشكە قاتىستى قىلمىستىق ءىس سوتقا جىبەرىلدى.
قىلمىستىق ءىس بويىنشا سامات ءابىش اۋىر سالدارعا اكەپ سوقتىرعان بيلىگىن جانە قىزمەتتىك وكىلەتتىگىن اسىرا پايدالاندى دەگەن كۇدىككە ىلىنگەن. كۇدىكتىگە قاتىستى ەشقايدا كەتپەۋ تۋرالى بۇلتارتپاۋ شاراسى قابىلدانعان. ول ءقازىر قازاقستاندا.
«دوستىق ەلشىسى»
ديماش قۇدايبەرگەننەن كەيىن وسى ماراپاتقا يە بولعان قازاق قىزى ءالينۇر جەڭىستىڭ وتباسى 15 جىل بۇرىن اتاجۇرتقا كوشىپ كەلگەن.
ەكى ەل اراسىندا ءتۇرلى فورۋمدار وتكىزگەن ول «دوستىق ەلشىسى» ناگراداسىن الدى. ءالينۇر مۇنىمەن شەكتەلمەي، جەكە كاسىپكەرلىكتى دە قولعا العان. بۇگىندە ءوز كوسمەتيكالىق برەندىن قالىپتاستىرىپ، ەلىمىزدە كاسىبىن ورلەتىپ ءجۇر.
ماسشتابى كەڭەيگەن مولدا
بەلگىلى يمام نۇرلان بايجىگىت ۇلى اقش پرەزيدەنتى دجو بايدەننەن شاقىرتۋ الدى.
"ءاربىر جىلى امەريكا قۇراما شتاتتارىنىڭ پرەزيدەنتى دجو بايدەن جانە وعان دەيىنگى پرەزيدەنتتەر جىلدا ءار مەملەكەتتەن تانىمال جانە مەملەكەت باسشىلارىنا جىلدا اس بەرىپ، ءدام بەرەدى. بۇل قايىرىمدىلىق اس بولىپ تابىلادى. سوندىقتان ءبىزدىڭ ەلدەن تاڭداۋ ماعان ءتۇسىپ تۇر ەكەن. مەملەكەتىمىزدىڭ مۇددەسىن، پرەزيدەنتىمىز جاساپ جاتقان ىشكى جانە سىرتقى ساياساتىن جەتكىزۋ، سونىمەن قاتار، ءبىزدىڭ رۋحانياتىمىزدى كەڭەيتۋ، پاش ەتۋ، قازاق تاريحىنىڭ كەڭ ەكەنىن كورسەتۋ ءۇشىن وسى ساپارعا نيەت ءبىلدىرىپ وتىرمىز. الداعى اپتادا ۇلكەن ساپارعا جول جۇرمەكپىز"، - دەيدى نۇرلان يمام.
اسىلدىڭ سىنىعى ەدى...
ءىلياس جانسۇگىر ۇلىنىڭ قىزى يلفا جانسۇگىروۆا ءوزىنىڭ تۋعان كۇنىندە، 90-عا قاراعان شاعىندا ومىردەن ءوتتى. بۇل تۋرالى فەيسبۋك الەۋمەتىك جەلىسىندە الاشتانۋشى ەلدوس الاش جازدى.
Dodo پيسسالى قازاقستان
Dodo پيسسەريالار جەلىسىنىڭ باس كەڭسەسى بريتاندىق ۆيرگين ارالدارىنان قازاقستانعا كوشەتىن بولدى. بۇل تۋرالى مالىمدەگەن Dodo Brands قارجى ديرەكتورى لينا ناۋموۆانىڭ ايتۋىنشا، بۇل شەشىمدى بەكىتۋ ءۇشىن 2024 جىلدىڭ 10 قاڭتارى مەن 26 قاڭتارى ارالىعىندا اكسيونەرلەردىڭ سىرتتاي داۋىس بەرەدى.
سالىق پەن ساپا
ۇيالى بايلانىس وپەراتورلارىنا ساپاسىز بايلانىس قىزمەتى ءۇشىن ايىپپۇل سالىندى.
زاڭنامادا كوزدەلگەن جەڭىلدىكتەردى ەسكەرە وتىرىپ ءموبيلدى وپەراتورلار 1 ملرد 644 ملن تەڭگە تولەگەن:
Tele2 – 751،4 ملن تەڭگە؛
Kcell – 563،2 ملن تەڭگە؛
Beeline – 329،4 ملن تەڭگە.
سيفرلانعان «التىن وردا»
اتالمىش بازاردى سيفرلاندىرۋ ءۇشىن altynordaresmi.kz سايتى ىسكە قوسىلدى.
ساۋدا جانە ينتەگراسيا مينيسترلىگىنىڭ ساۋدا كوميتەتى «التىن وردا» بازارىنىڭ اكىمشىلىگىمەن بىرلەسىپ، بازار جۇمىسىنىڭ اشىقتىعىن قامتاماسىز ەتۋ ءۇشىن بىرلەسكەن ءىس-شارالار جوسپارىن بەكىتتى. ونىڭ شەڭبەرىندە 2023 جىلعى جەلتوقساننان باستاپ، بازاردىڭ كىرەبەرىسىنە 6 QR-كودى بار اۆتوماتتى شلاگباۋم مەن كىرۋ اقىسىن تولەۋ ءۇشىن پاۆيلونداردا 6 POS-تەرمينال ورناتىلدى.