الماتىدا ءبىر جىلدىڭ ىشىندە قۇرىلىس نىساندارى 1074 رەت جوسپاردان تىس تەكسەرىلدى
الماتى قالاسى قۇرىلىسىن باقىلاۋ باسقارماسى بىلتىر سوتتارعا زاڭ تالاپتار مەن قۇرىلىس نورمالارىن بۇزعانى ءۇشىن 174 تالاپ-ارىز جولدادى.
ونىڭ 81ء-ى قاناعاتتاندىرىلدى، 93ء-ى قارالىپ جاتىر، دەپ حابارلايدى Almaty-akshamy.kz.
بۇل رەتتە، 86 تالاپ-ارىز بۇزۋعا جىبەرىلدى، 41 تالاپ-ارىز بويىنشا وڭ سوت شەشىمى شىعارىلدى، 45ء-ى قارالىپ جاتىر. نۇسقامانى ورىنداۋعا 88 تالاپ قويىلدى، ونىڭ ىشىندە سوتتار 40 تالاپ-ارىزدى قاناعاتتاندىردى، قالعاندارى قارالۋدا. سونىڭ ناتيجەسىندە 22 نىسان بويىنشا بۇزۋ جۇمىستارى جۇرگىزىلدى.
باقىلاۋ فۋنكسيالارى اياسىندا 2023 جىلى باسقارما جوسپاردان تىس 1074 تەكسەرۋ جۇرگىزدى، اتاپ ايتقاندا، قالا تۇرعىندارىنىڭ ءوتىنىشى نەگىزىندە 1140 بۇزۋشىلىق انىقتالدى. بۇزۋشىلىقتاردى جويۋعا 634 نۇسقاما بەرىلدى. ساپاسىز قۇرىلىس جانە قۇرىلىس-مونتاجداۋ جۇمىستارىن جۇرگىزۋدى ۇيىمداستىرعانى ءۇشىن 68 ۇيىم جاۋاپكەرشىلىككە تارتىلدى.
ايتا كەتەيىك، سالىنىپ جاتقان نىساندار بويىنشا تولىق ءارى سوڭعى اقپارات الۋ ءۇشىن ازاماتتارعا ارناپ 8-705-896-60-00 ءنومىرى بويىنشا انىقتاما جەلىسى ىسكە قوسىلدى. 2023 جىلى وسى ارنا ارقىلى الماتى قالاسى قۇرىلىسىن باقىلاۋ باسقارماسىنا 3 مىڭنان استام ءوتىنىش كەلىپ ءتۇستى.