15 ءساۋىر – قوزى كورپەش – بايان سۇلۋ عاشىقتار كۇنى رەتىندە مەرەكە بولىپ اتالىپ كەلەدى.
بۇل كۇندى اتاپ ءوتۋ تۋرالى باستاما 1999 جىلى كوتەرىلگەن ەكەن. اتالعان مەرەكە حIV-XV عاسىرلارداعى قوزى كورپەش –بايان سۇلۋ ماحابباتارىنىڭ سيمۆولى رەتىندە اتالىپ وتىلەدى.
عاشىقتار كۇنىنىڭ شىعۋ تاريحىن Almaty-akshamy.kz Massaget.kz-كە سىلتەمە جاساي وتىرىپ، حابارلايدى.
جىل سايىن بۇل مەرەكە 15 ءساۋىر كۇنى اتالىپ وتەدى. ماڭگىلىك ماحاببات سيمۆولىنا اينالعان قوزى مەن بايان كۇنىن العاش 1999 جىلى قوعام جانە مەملەكەت قايراتكەرى دارحان مىڭباي ۇسىنعان ەدى. ول جاستار ۇيىمدارى، وقۋ ورىندارى مەن بۇقارالىق اقپارات قۇرالدارىن ۇلتتىق عاشىقتار كۇنىن مەرەكەلەۋگە شاقىردى. دارحان مىڭبايدىڭ باستاماسى كوپتىڭ كوڭىلىنەن شىققانى راس، ءبىراق مەرەكەنىڭ ناقتى داتاسى كوپكە دەيىن بەلگىلەنبەي، ءار ءوڭىر ءارتۇرلى تويلاي باستادى. ماسەلەن، تارازدا 15 ءساۋىر — قوزى كورپەش – بايان سۇلۋ كۇنى، سەمەيدە 11 ناۋرىز – بايان كۇنى، ال قىزىلوردادا 19 مامىر – قوزى كۇنى اتالسىن دەپ جان-جاققا تارتتى.
2011 جىلى الماتى اكىمدىگىنىڭ جاستار ساياساتى باسقارماسى 15 ءساۋىردى – ۇلتتىق عاشىقتار كۇنى رەتىندە وزدەرىنىڭ رەسمي شارالارىنىڭ قاتارىنا قوستى. ال 2012 جىلى ەلورداداعى سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ ستۋدەنتتەرى ماحاببات كۇنىن قازاقتىڭ ۇلتتىق "اقسۇيەك "ويىنىمەن جاڭعىرتىپ، جاستار ويىن-ساۋىعىن ۇيىمداستىردى. ءدال سول جىلى كوكشەتاۋدىڭ ەرىكتى جاستارى دا قوزى مەن بايان كۇنىن تاۋەلسىزدىك الاڭىندا اتاپ ءوتتى. سودان بەرى قوس عاشىقتىڭ كىرشىكسىز سەزىمىن دارىپتەپ، ۇلتتىق مادەنيەتىمىز بەن سالت-داستۇرىمىزگە نەگىزدەلگەن مەرەكەنى تويلايتىن جاستاردىڭ سانى بىرتىندەپ ارتىپ كەلەدى.
قوزى كورپەش – بايان سۇلۋ جىرى
قوزى كورپەش — بايان سۇلۋ ەپوسى – حالقىمىزدىڭ ءىنجۋ-مارجانى، اسىل قازىناسى. بىر-بىرىنە قوسىلا الماعان قوس عاشىقتىڭ قايعىلى ماحابباتىن جىرلايدى. ليرو-ەپوستىق جىر XIII-XIV عاسىرلاردان باستاپ جىرلانىپ، XIX عاسىردىڭ ورتاسى تۇسىندا قاعازعا ءتۇسىرىلدى. قوزى مەن بايان ەپوسى سىبانباي، بەكباۋ، جاناق، شوجە اقىندار ارقىلى اۋىزدان-اۋىزعا تاراپ، ۇرپاقتان-ۇرپاققا جەتتى.
بۇگىندە 20-عا جۋىق نۇسقانىڭ ىشىنەن ەڭ بەلگىلىسى – جاناقتىڭ نۇسقاسى. ماحاببات جىرى سارىباي مەن قارابايدىڭ اڭ اۋلاپ ءجۇرىپ، بەل قۇدا بولۋىنان باستالادى. ەكى اكە سەرتتەسىپ، قوزى مەن باياندى قوسپاق بولادى. ءبىراق، اڭ اۋلاپ ءجۇرىپ، ۇلدى بولعانىن ەستىگەن سارىباي بالاسىن كورە الماي قازا بولادى. ۋاقىت وتە، دۇنيەقوڭىز قاراباي "قىزىمدى جەتىم ۇلعا بەرمەيمىن" دەپ، ءبىر كەزدەرى وتارىن جۇتتان قۇتقارعان قودارعا ۇزاتپاقشى بولادى. قوس عاشىقتىڭ قوسىلۋىن قالاماعان قودار ايلاسىن اسىرىپ، قوزىنى ولتىرەدى. قايعىدان قابىرعاسى قايىسقان بايان سۇلۋ ءوش الۋ ءۇشىن قۋلىققا باسادى. ول قودارعا قۇدىقتان سۋ الىپ بەرسە، وعان كۇيەۋگە شىعاتىنىن ايتادى. قىزدىڭ سوزىنە سەنگەن قودار ونىڭ بۇرىمىنان ۇستاپ، قۇدىقتىڭ تۇبىنە تۇسە بەرگەندە، بايان بۇرىمىن كەسىپ تاستايدى. وسىلايشا، قودار ءتۇپسىز تۇڭعيىققا قۇلاپ ولەدى. سودان كەيىن بايان عاشىعى جاتقان كۇمبەزگە كەلىپ، وز-وزىنە قول جۇمسايدى. بەلگىلى جازۋشى، دراماتۋرگ عابيت مۇسىرەپوۆتىڭ وسى اتتاس پەساسى بار. شىعارما 1939 جىلى ءساۋىر ايىندا جازىلىپ بىتكەن. بايان سۇلۋ – قوزى كورپەش تراگەدياسى العاش رەت 1940 جىلدىڭ 29 ساۋىرىندە م.اۋەزوۆ اتىنداعى قازاق مەملەكەتتىك اكادەميالىق دراما تەاترىندا ساحنالاندى. ال 1992 جىلى ءاسانالى ءاشىموۆ تۇسىرگەن "قوزى كورپەش پەن بايان سۇلۋ" كينوكارتيناسى كورەرمەندەرگە جول تارتتى. شىعىس قازاقستان وبلىسىنىڭ اياگوز اۋدانىندا قوزى كورپەش پەن بايان سۇلۋ كەسەنەسى بار. مازار "قازاقستاننىڭ كيەلى جەرلەرى" تىزىمىنە ەنگەن.