بۇگىندە قازاقستاندا 3 ملن استام ادام ساقتاندىرىلماعان.
بيىلعى جىلدىڭ قىركۇيەك ايىنان باستاپ ءوزىن-وزى جۇمىسپەن قامتىعان تۇرعىندار ءۇشىن ساقتاندىرۋدىڭ جاڭا ءتارتىبى قولدانىسقا ەنگىزىلەدى. زاڭعا ەنگەن وزگەرىستەرگە سايكەس، بۇدان بىلاي ساقتاندىرۋ جۇيەسىنە قوسىلۋ ءۇشىن الداعى 12 ايعا جارنا تولەۋگە بولادى، دەپ حابارلايدى Almaty-akshamy.kz مەديسينالىق ساقتاندىرۋ قورى الماتى فيليالىنىڭ باسپا ءسوز قىزمەتىنە سىلتەمە جاساپ.
حابارلاماعا سۇيەنسەك، ساقتاندىرىلماعان پاسيەنتتەر مەديسينالىق كومەكتى پايدالانۋ ءۇشىن قىركۇيەك ايىنان باستاپ 2023 جىلدىڭ قىركۇيەگىنە دەيىن جارنا اۋدارا الادى. سول ارقىلى ولار الداعى ءبىر جىلعا ءوزىن-وزى ساقتاندىرۋ مۇمكىندىگىنە يە بولماق.
قازىرگى تاڭدا ءوز بەتىنشە تولەم جاساۋشىلاردىڭ اي سايىنعى جارناسى 3000 تەڭگەنى قۇراپ وتىر.
فيليال باسشىسى تىلەۋحان ابىلدايەۆتىڭ ايتۋىنشا، بۇگىندە قازاقستاندا 3 ملن استام ادام ساقتاندىرىلماعان.
«ساقتاندىرىلماعان ازاماتتار تاۋەكەل توبىنا جاتادى. ويتكەنى ولار شۇعىل جاعدايلاردى قوسپاعاندا، جوسپارلى مەديسينالىق كومەكتى پايدالانا المايدى. اتالعان وزگەرىستەر وسىنىڭ الدىن الۋ ماقساتىندا جانە حالىقتىڭ سۇرانىسى بويىنشا ەنگىزىلگەن بولاتىن. ناتيجەسىندە ساقتاندىرىلماعان حالىقتىڭ شامامەن 30%-ى جاڭا تولەم ءتۇرىن پايدالانادى دەگەن بولجام جاسالىپ وتىر. سونىمەن قاتار وتكەن ايلارعا بەرەشەگى جوق ازاماتتار ءۇشىن ءمامس جارناسىن اي سايىن تولەۋ قۇقىعى ساقتالادى»، - دەدى تىلەۋحان ابىلدايەۆ.
ەستەرىڭىزگە سالا كەتسەك، بۇعان دەيىن ساقتاندىرۋ پاكەتىندەگى قىزمەتتەردى پايدالانۋ ءۇشىن دەربەس تولەۋشىلەر وتكەن 12 ايدىڭ جارناسىن تولەۋگە مىندەتتەلگەن بولاتىن.
مەديسينالىق كومەك ساپاسىنا قاناعاتتانباعان جاعدايدا ازاماتتار ەمحانانىڭ پاسيەنتتەردى قولداۋ قىزمەتىنە جۇگىنە الادى. ەگەر ماسەلەنى سول جەردە شەشۋ مۇمكىن بولماسا، مسق-نىڭ fms.kz رەسمي سايتى، 1406 بايلانىس ورتالىعى، Qoldau 24/7 ءموبيلدى قوسىمشاسى جانە Telegram-داعى SaqtandyryBot ارقىلى شاعىم قالدىرۋعا بولادى.