الماتى الەۋمەتتىك مەديسينالىق ساقتاندىرۋ قورىنىڭ ديرەكتورى تىلەۋحان ابىلدايەۆ وڭىرلىك كوممۋنيكاسيالار قىزمەتىنىڭ بريفينگىندە الماتى قالاسىنداعى مەديسينالىق ساقتاندىرۋ تۋرالى ايتىپ بەردى.
سپيكەردىڭ ايتۋىنشا، جوعارى تەحنولوگيالىق وپەراسيالاردى قارجىلاندىرۋ 5،4 ملرد تەڭگەگە ارتتى، سونىمەن قاتار، بيىل ەكو پروسەدۋرالارىنا 3،2 ملرد تەڭگە ءبولىندى، دەپ حابارلايدى Almaty-akshamy.kz
جۋرناليستەر الدىندا ءسوز سويلەگەن تىلەۋحان ابىلدايەۆ بۇگىندە قور تەگىن مەديسينالىق كومەكتىڭ كەپىلدىك بەرىلگەن كولەمى شەڭبەرىندە جانە مىندەتتى الەۋمەتتىك مەديسينالىق ساقتاندىرۋ پاكەتىندە مەديسينالىق قىزمەتتەردى قارجىلاندىرۋدى جالعاستىرىپ جاتقانىن اتاپ ءوتتى.
«ءمامس ەنگىزىلگەننەن بەرى الماتى قالاسىنىڭ دەنساۋلىق ساقتاۋ بيۋدجەتى ەداۋىر ارتتى. 2022 جىلعا ناقتىلانعان بيۋدجەت 242،1 ملرد تەڭگەنى قۇرادى، بۇل وتكەن جىلمەن سالىستىرعاندا 17،3%-عا ارتىق»، - دەپ حابارلادى الماتى قالاسىنداعى ءمامس قورىنىڭ ديرەكتورى.
ءمامس ماڭىزدى ارتىقشىلىقتارىنىڭ ءبىرى ەكو سياقتى قىمبات راسىمدەردى قارجىلاندىرۋدى ارتتىرۋ بولدى. مىسالى، وسى جىلعا 3152 قىزمەتكە 3،2 ملرد تەڭگەدەن استام قارجى ءبولىندى. اعىمداعى جىلدىڭ 4 ايىندا جالپى سوماسى 484 ملن تەڭگەگە ەكۇ-نىڭ 476 ءراسىمى وتكىزىلدى. بۇگىندە مەديسينالىق ساقتاندىرۋ اياسىندا قالانىڭ سەگىز مەديسينالىق ۇيىمى ەكستراكورپورالدىق ۇرىقتاندىرۋدى جۇزەگە اسىرۋدا.
تىلەۋحان ابىلدايەۆ اعىمداعى جىلدىڭ 4 ايىندا قور ءمامس پاكەتىندە الماتى قالاسى بويىنشا مەديسينالىق كومەككە تولەۋگە شامامەن 54،9 ملرد تەڭگە باعىتتاعانىن ءتۇسىندىردى. ءقاڭتار-ساۋىر ارالىعىنداعى شىعىنداردىڭ باسىم بولىگى ستاسيونارلىق مەديسينالىق كومەكتى تولەۋگە تيەسىلى، بۇل 28،5 ملرد تەڭگەدەن استام. كونسۋلتاسيالىق-دياگنوستيكالىق كومەك كورسەتكەنى ءۇشىن مەديسينالىق ۇيىمدارعا تاعى 11،4 ملرد تەڭگە تولەندى. ولاردىڭ ىشىندە ەڭ كوپ سۇرانىسقا يە كت جانە مرت.
ءمامس جۇيەسى اياسىندا وڭالتۋ كومەگىنە 3،4 ملرد تەڭگە باعىتتالدى. سپيكەر مىندەتتى الەۋمەتتىك مەديسينالىق ساقتاندىرۋ جۇيەسىن ەنگىزۋ مەديسينالىق وڭالتۋدى قارجىلاندىرۋدى ۇلعايتۋعا جانە ونىڭ قولجەتىمدىلىگىن ەداۋىر ارتتىرۋعا مۇمكىندىك بەرگەنىن اتاپ ءوتتى.