2025 جىلدىڭ ءبىرىنشى جارتىسىندا وڭتۇستىك استانادا 19 مىڭنان استام بالا تۋىلعان.
جۇكتى ايەلدەردى بوساندىرۋعا كەتكەن 5،4 ملرد تەڭگە تولىعىمەن مەديسينالىق ساقتاندىرۋ قورى تاراپىنان تولەندى.
قوردىڭ الماتى قالالىق فيليالى مالىمەتىنشە، بوساندىرۋعا كەتەتىن شىعىندار تولىعىمەن ءمامس قاراجاتى ەسەبىنەن جابىلادى. ال، بوسانۋ باعاسى ونىڭ كۇردەلىلىك دەڭگەيى مەن بوساندىرۋ ادىسىنە بايلانىستى وزگەرىپ وتىرادى. مىسالى، ايەل ءوز بەتىنشە، اسقىنۋسىز بوسانسا تاريفيكاتور بويىنشا 100 مىڭ تەڭگە، كەسار تىلىگىمەن بوسانعان جاعدايدا 1،3 ملن تەڭگەگە دەيىن تولەنۋى مۇمكىن.
بۇگىنگى تاڭدا الماتى قالاسىندا 6 پەرزەنتحانا جۇمىس ىستەيدى. ولاردىڭ ءبارى دە قالىپتى جانە كۇردەلى جۇكتىلىكپەن كەلگەن ايەلدەردى بوساندىرۋعا، سونداي-اق كەسار وتاسىن جاساۋعا ماماندانعان. جۇكتى ايەلدەر ءمامس جۇيەسىندە بۇدان باسقا مىناداي كومەك تۇرلەرىن پايدالانا الادى:
* پرەگراۆيدتى دايارلىق — جۇكتىلىكتى الدىن-الا جوسپارلاۋ، ايەلدى بالا كوتەرگەنگە دەيىن تەكسەرىپ، ەمدەپ، ءتۇرلى دەرت سالدارىنان جۇكتىلىك كەزىندە بولاتىن اسقىنۋلاردىڭ الدىن الۋ. 2025 جىلى بۇل باعدارلاماعا قور تاراپىنان 673 ملن تەڭگە قاراستىرىلعان.
* انتەناتالدى باقىلاۋ — جۇكتىلىك كەزىندە اكۋشەر-گينەكولوگتىڭ تۇراقتى باقىلاۋىندا بولۋ، جوسپارلى اناليزدەردى تاپسىرۋ، ۋلترادىبىستىق زەرتتەۋدەن، سكرينينگتەردەن ءوتۋ، سالالىق ماماندار كومەگىنە جۇگىنۋ ت.ب. قىزمەتتەر بار. بۇعان قور 3،8 ملرد تەڭگە ءبولدى.
* بوساندىرۋ – قالىپتى بوساندىرۋ، كەسار تىلىگىمەن وتا جاساۋ، دارى-دارمەكتەرمەن جانە قوسالقى ماتەريالدارمەن قامتاماسىز ەتۋ. وعان – 12 ملرد تەڭگە قاراستىرىلعان.
* بوسانعاننان كەيىنگى باقىلاۋ — العاشقى كۇندەرى انا مەن بالاعا كومەك.
* نەوناتالدىق كومەك — جاس نارەستەلەردى كۇتۋ، اسقىنۋلار بولعان جاعدايدا ينتەنسيۆتى تەراپيا جاساۋ.
قازاقستاندا جۇمىس ىستەيتىن جۇكتى ايەلدەرگە ءمامس ءۇشىن جارنانى جۇمىس بەرۋشى، جۇمىس ىستەمەيتىندەر ءۇشىن مەملەكەت تولەيدى. بالا دۇنيەگە كەلگەن ساتتەن باستاپ 18 جاسقا دەيىن مەملەكەت تاراپىنان ساقتاندىرىلادى.
«ءبىزدىڭ ەلىمىزدە بارلىق ايەل ساقتاندىرىلعان. ولاردىڭ ءارقايسىسى تەگىن بوسانۋعا حاقىلى. بوساندىرۋعا كەتەتىن شىعىن قانشا بولسا دا ءمامس ەسەبىنەن تولەنەدى»، — دەپ اتاپ ءوتتى الماتى فيليالى ديرەكتورۆ ءىلياس مۇحامەدجان.