مەملەكەت باسشىسى ەل حالقىن كونستيتۋسيا كۇنىمەن قۇتتىقتادى.
پرەزيدەنتتىڭ اتا زاڭ كۇنىمەن قۇتتىقتاۋى اقوردانىڭ رەسمي سايتىندا جاريالاندى، دەپ حابارلايدى Aqshamnews.kz.
"قۇرمەتتى وتانداستار! بارشاڭىزدى كونستيتۋسيا كۇنىمەن قۇتتىقتايمىن! وسىدان 30 جىل بۇرىن وتكەن رەفەرەندۋمدا حالقىمىز اتا زاڭىن قابىلداپ، تاريحي تاڭداۋىن جاسادى. كونستيتۋسيامىز قازاقستان رەسپۋبليكاسى تاۋەلسىزدىگىنىڭ، قازاق مەملەكەتتىلىگىنىڭ بەرىك تۇعىرىنا اينالدى. وندا ۇلتىمىزدىڭ بۇگىنىن جانە بولاشاعىن ايقىندايتىن مىزعىماس قۇندىلىقتار مەن قاعيداتتار ناقتى كورىنىس تاپتى. اتا زاڭ قازاقستاننىڭ بارلىق ازاماتىنىڭ مۇددەسىن ۇلتىنا، دىنىنە قاراماستان بىردەي قورعايتىن الەۋمەتتىك مەملەكەت رەتىندەگى قۇقىقتىق ىرگەتاسىن قالىپتاستىردى. كونستيتۋسيا قوعامدىق كەلىسىم مەن ىشكى تۇراقتىلىقتىڭ باستى كەپىلى سانالادى. سان ءتۇرلى سالاداعى جەتىستىكتەرگە وسى نەگىزگى زاڭىمىزعا سۇيەنە وتىرىپ قول جەتكىزدىك. ءۇش جىل بۇرىن ەل دامۋىنىڭ جاڭا تاريحي كەزەڭىندەگى مىندەتتەرگە سايكەس، اۋقىمدى كونستيتۋسيالىق رەفورما جاسالدى. ونىڭ باستى ناتيجەسى – ساياسي جۇيەنىڭ «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» تۇجىرىمداماسىنىڭ نەگىزىندە جاڭعىرۋى. كونستيتۋسيالىق رەفورمادا ادام قۇقىقتارىن قورعاۋعا، زاڭ مەن ءتارتىپ ۇستەمدىگىن ورنىقتىرۋعا باسا ءمان بەرىلدى. اتا زاڭعا الەمدىك تاجىريبەدە بۇرىن-سوڭدى بولماعان، يننوۆاسيالىق سيپاتتاعى ءبىرقاتار جاڭا ەرەجە ەنگىزىلدى. قازاقستاننىڭ كونستيتۋسيالىق رەفورماسىنا ۆەنەسيا كوميسسياسى جانە وزگە دە بەدەلدى حالىقارالىق ۇيىمدار، سونداي-اق شەتەلدىك ساراپشىلار وڭ باعاسىن بەردى. ادىلەتتى، تازا، قۋاتتى ءارى ءقاۋىپسىز قازاقستان قۇرامىز دەسەك، ازاماتتارىمىز اتا زاڭدى قۇرمەتتەپ، ونىڭ بارلىق ەرەجەسىن مۇلتىكسىز ساقتاۋى كەرەك. قازاقستان رەسپۋبليكاسىنىڭ ستراتەگيالىق ماقساتتارىنا ۇلتىمىزدى جۇمىلدىراتىن كونستيتۋسيامىزدىڭ اياسىندا بارشا ازاماتىمىزدىڭ وتانىمىزدى وركەندەتۋ ءۇشىن جاسامپازدىقپەن ەڭبەك ەتۋىنە بارلىق جاعداي جاسالعان. ەلىمىزدىڭ بارشا ازاماتىنا زور دەنساۋلىق، باق-بەرەكە تىلەيمىن!"، - دەدى پرەزيدەنت قۇتتىقتاۋىندا.