125 مىڭ تەگىن گرانت بولىنەدى.
بيىل تەحنيكالىق جانە كاسىپتىك ءبىلىم بەرۋگە مەملەكەتتىك تاپسىرىس 45 مىڭ ورىنعا ارتىپ، 125 مىڭ تەگىن گرانت بولىنەدى. بۇل تۋرالى ق ر بعم تەحنيكالىق جانە كاسىپتىك ءبىلىم دەپارتامەنتىنىڭ ديرەكتورى ناسىمجان وسپانوۆا ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«جاستاردى سۇرانىسقا يە ماماندىقتار بويىنشا تەگىن تەحنيكالىق جانە كاسىپتىك بىلىممەن 100 پايىز قامتۋ ءۇشىن مەملەكەتتىك تاپسىرىستى ۇلعايتۋ كەرەك. وسى ورايدا بيىل رەسپۋبليكالىق بيۋدجەت ەسەبىنەن مەملەكەتتىك تاپسىرىس 45 مىڭ ورىنعا ارتادى. سونىمەن قاتار اكىمدىكتەر دە مەملەكەتتىك تاپسىرىس بويىنشا 80 مىڭ ورىندى جوسپارلاپ وتىر. جالپى، كوللەدجدەردە تەگىن ءبىلىم الۋعا 125 مىڭ ورىن بەرىلەدى. پرەزيدەنتتىڭ تەحنيكالىق جانە كاسىپتىك ءبىلىم بەرۋدى قايتا قاراۋعا قاتىستى تاپسىرماسى بارشامىزعا ايان»، - دەدى ناسىمجان وسپانوۆا ورتالىق كوممۋنيكاسيالار قىزمەتى الاڭىندا وتكەن باسپا ءسوز ءماسليحاتىندا.
ونىڭ ايتۋىنشا، 2025 جىلعا دەيىن مەملەكەتتىك تاپسىرىستىڭ 70 پايىزى تەحنيكالىق ماماندىقتارعا بەرىلەدى.
«ءقازىر ول كورسەتكىش 45 پايىزدى قۇرايدى. ماماندىقتارعا كەلسەك، مەتاللۋرگيا، IT، قۇرىلىس، ينجەنەريا، ماشينا جاساۋ تاعى سول سياقتى. بۇگىنگى تاڭدا ارنايى كوميسسيالار وڭىرلەردە ەڭبەك نارىعىندا سۇرانىسقا يە ماماندىقتاردىڭ تىزبەسىن جاساقتاۋدا. ناتيجەسىندە كەرەك ماماندىقتار بويىنشا ورىن ساندارىن بەكىتەدى. بيىل 30 ساۋىردەن باستاپ ءبىلىم باسقارمالارى مەملەكەتتىك تاپسىرىس بولىنگەن ماماندىقتار تۋرالى اقپاراتتى رەسمي سايتتارىندا ورنالاستىرادى»، - دەيدى ول.