ماماندار قورىلداۋدان قۇتىلۋدىڭ ءادىسىن ايتتى

بۇيىرىمەن جاتىپ ۇيىقتاۋعا كەڭەس بەرەدى.

ادام ۇيقىسىن زەرتتەيتىن ساراپشىسى مامان نارۆانا اميني قورىلداۋدىڭ ەرىكسىز ارەكەت ەكەنىن ايتتى. ونىڭ ايتۋىنشا، ادامنىڭ ۇيىقتايتىن ورنى وتە ماڭىزدى. ول شالقاسىنان ۇيىقتايتىن ادامدار باسقا قالىپتا ۇيىقتايتىندارعا قاراعاندا ءجيى قورىلدايتىنىن ايتىپ، اۋرۋدان قۇتىلۋ جولدارىن ايتتى، دەپ حابارلايدى Almaty-akshamy.kz Lenta.ru سىلتەمە جاساپ. 

قورىلداۋدىڭ الدىن الۋ ءۇشىن مامان بۇيىرىمەن جاتىپ ۇيىقتاۋعا كەڭەس بەرەدى. ادام شالقاسىنان ۇيىقتاعان جاعدايدا، اۋىرلىق كۇشى ءتىلىن اۋزىنا باسىپ، تىنىس الۋ جولدارىندا بىتەلۋدى تۋدىرادى، سول سەبەپتەن ادام قورىلداپ ۇيقتايدى. ول سونداي-اق كۇندىز كوبىرەك سۇيىقتىق ىشۋگە كەڭەس بەردى، ويتكەنى بۇل تۇندە اۋىزداعى جانە تاماقتاعى كەپتەلۋدى جەڭىلدەتەدى. 

«يەگىڭىزدى كەۋدەگە قىسپاڭىز نەمەسە باسىڭىزدى تومەن تۇسىرمەڭىز، سەبەبى بۇل تىنىس الۋ جولىڭىزدى بىتەپ، تىنىس الۋدى قيىنداتادى. قولدارىڭىزدى بەلدە نەمەسە بۇيىرلەرىڭىزگە پاراللەل ۇستاڭىز. ەگەر سىزدە وسى پوزيسيادا بۋىندارىڭىز اۋىرسا، ومىرتقانى تۋرالاۋ جانە تومەنگى ارقاداعى اۋىرسىنۋدى جەڭىلدەتۋ ءۇشىن تىزەڭىزدىڭ اراسىنا جاستىق قويىپ كورىڭىز »، - دەدى اميني. 

ۇلىبريتانيانىڭ ۇلتتىق دەنساۋلىق ساقتاۋ قىزمەتىنىڭ (NHS) ساراپشىلارى قورىلداۋدىڭ ارتىق سالماقتان تۋىنداۋى مۇمكىن ەكەنىن ەسكەرتتى. بۇل جاعدايدا مويىن مەن تاماق اينالاسى ۇلعايىپ، ۇيقى كەزىندە تىنىس جولدارىن بىتەۋى ىقتيمال. ودان ارىلۋ ءۇشىن سالماقتى ازايتۋ كەرەك، دەيدى دارىگەرلەر. 

بۇعان دەيىن دارىگەر ءارى تەلەجۇرگىزۋشى ەۆگەنيي كوماروۆسكيي قورىلداۋدىڭ ءقاۋىپتى ەكەنىن ايتىپ، ونى ەمدەۋدەگى باستى قاتەلىك دەپ اتاعان بولاتىن. دارىگەردىڭ ايتۋىنشا، ۇيقى كەزىندە تىنىس الۋدىڭ كىدىرىسىمەن جۇرەتىن قورىلداۋدىڭ ەرەكشە تۇرلەرى بار.