ماماندار قازاقستاندا كارتوپ قورى جەتكىلىكتى ەكەنىن ايتتى

وسى ايدىڭ باسىنان بەرى كارتوپتىڭ باعاسى 5%-عا تومەندەدى.

قازاقستاندا كارتوپ قورى جەتكىلىكتى. بۇل تۋرالى اۋىل شارۋاشىلىعى ءمينيسترى ەربول قاراشوكەيەۆ ورتالىق كوممۋنيكاسيالار قىزمەتىندە وتكەن بريفينگ بارىسىندا ايتتى، دەپ حابارلايدى Almaty-akshamy.kz Ortcom.kz cىلتەمە جاساپ.

مينيستر بريفينگ بارىسىندا اكىمدىكتەردىڭ اقپاراتى سۇيەنىپ، بۇگىنگى كۇنى كارتوپ قورى جەتكىلىكتى ەكەنىن ايتتى. ونىڭ ايتۋىنششا، ماۋسىم ايىنان باستاپ ەرتە پىسەتىن كارتوپتى جيناۋ باستالدى. ەرتە پىسەتىن كارتوپتىڭ جالپى ءونىمى بۇگىندە 270 مىڭ توننانى قۇرايدى. تامىزدىڭ ءبىرىنشى جارتىسىندا 7،8 مىڭ توننا جيناۋ جوسپارلانعان.

ءمينيستردىڭ سوزىنە جۇگىنسەك، ەرتە پىسەتىن كارتوپ ءونىمىنىڭ جينالۋى ىشكى نارىقتى مولىقتىرۋعا جانە كارتوپ باعاسىنىڭ تۇراقتانۋىنا ىقپال ەتتى. وسى ايدىڭ باسىنان بەرى كارتوپتىڭ باعاسى 5%-عا تومەندەدى، 184 تگ/كگ-نان 179 تگ/كگ-عا دەيىن. 

«كارتوپ بويىنشا ىشكى نارىقتىڭ ايلىق قاجەتتىلىگى 153 مىڭ توننانى قۇرايدى. قىركۇيەكتەن باستاپ كۇزگى كارتوپتى جيناۋ باستالادى، ونىڭ كولەمى 4 ملن توننادان اسادى، بۇل ىشكى نارىقتىڭ قاجەتتىلىگىن تولىق قامتاماسىز ەتەدى جانە بەلگىلى ءبىر كولەمدى ەكسپورتقا جونەلتۋگە مۇمكىندىك بەرەدى. قىرىققابات پەن ءسابىز بويىنشا دا جاعداي تۇراقتى. ياعني، ەرتە قىرىققابات پەن ءسابىز كولەمى كۇزگى ەگىن جيناعانعا دەيىن ىشكى نارىقتى قامتاماسىز ەتۋ ءۇشىن جەتكىلىكتى. سونىمەن قاتار تامىزدىڭ سوڭعى ونكۇندىگىنەن باستاپ كوكونىس ونىمدەرىنىڭ كۇزگى ءونىمى نارىققا شىعادى دەپ كۇتىلۋدە»، - دەدى ەربول قاراشوكەيەۆ.