تاشكەنتتە «اۋعانستان: قاۋىپسىزدىك جانە ەكونوميكالىق دامۋ» دەپ اتالاتىن حالىقارالىق كونفەرەنسيا ءوتىپ جاتىر.
«تاليبان» ۇكىمەتى اۋعانستاننىڭ اۋماعىن تەرروريستىك ۇيىمداردىڭ پايدالانبايتىنىنا كەپىلدىك بەرەدى. تاليبان ۇكىمەتىنىڭ سىرتقى ىستەر ءمينيسترىنىڭ مىندەتىن اتقارۋشى اميرحان مۋتتاكي تاشكەنتتەگى حالىقارالىق كونفەرەنسيادا سويلەگەن سوزىندە وسىنداي مالىمدەمە جاسادى، دەپ حابارلايدى Almaty-akshamy.kz Inbusiness.kz سىلتەمە جاساپ.
«اۋعانستان ايماقتاعى تۇراقسىزدىقتىڭ بەسىگىنە اينالمايدى، باسشىلىق ەل اۋماعىن ال-كايدا مەن باسقا دا تەرروريستىك ۇيىمداردىڭ پايدالانبايتىنىنا كەپىلدىك بەرەدى»، – دەدى مۋتتاكي.
ونىڭ ايتۋىنشا، اۋعانستاننىڭ قازىرگى ماقساتى الەمنىڭ بارلىق ەلدەرىمەن ديپلوماتيالىق قارىم-قاتىناس ورناتۋ بولىپ تابىلادى.
مۋتتاكي ەلدىڭ نەگىزگى باعىتى ەكونوميكالىق دامۋ، سونداي-اق اۋعانستاندى ورتالىق جانە وڭتۇستىك ازيانى دامىتۋ حابىنا اينالدىرۋ ەكەنىن اتاپ ءوتتى.
تاشكەنتتە ءوتىپ جاتقان «اۋعانستان: قاۋىپسىزدىك جانە ەكونوميكالىق دامۋ دەپ اتالاتىن حالىقارالىق كونفەرەنسياعا الەمنىڭ 20-دان استام ەلىنەن دەلەگاسيالار كەلدى. ولاردىڭ قاتارىندا قازاقستان دا بار.