الماتى وبلىسىنىڭ تۇرعىندارى زاۋىتتاعى كارىز قۇدىعىن جابۋدى تالاپ ەتتى

زاۋىتتىڭ جۇمىسى ءقازىر ۋاقىتشا توقتاپ تۇر.

الماتى وبلىسى شالقار اۋىلىنىڭ تۇرعىندارى ءۇي ماڭىندا قازىلىپ جاتقان كارىز قۇدىعىنا قارسىلىعىن ءبىلدىردى، دەپ حابارلايدى Almaty-akshamy.kz Almaty.tv سىلتەمە جاساپ.

حالىقتىڭ ايتۋىنشا،  10 سوتىق جەردى الىپ جاتقان قازانشۇڭقىرعا وسىندا ورنالاسقان شاراپ زاۋىتى قالدىق سۋلارىن توكپەكشى. ال جەرگىلىكتى اكىمدىك مەكەمەنىڭ بۇل ارەكەتى زاڭسىز، ەندى قاجەتتى تەكسەرىس جۇمىسىن جۇرگىزۋ كەرەك دەيدى.

«قالدىقتاردى وسى كارىزگە توگەدى. بۇل جەر تولىپ قالىپ ەدى، جانىنان تاعى تەسىپ قويعان، ءقازىر كورەسىزدەر. قالدىقتار جايىلىمعا اعىپ بارادى. ءاۋ باستا باسقا جەرگە توگەتىن.  حالىق يىسىنە شىداماي، شۋلاعان سوڭ، وسى جەردى پايدالانىپ ءجۇر»، – دەدى شالقار اۋىلىنىڭ تۇرعىنى داۋرەن المابەكوۆ.

ال 150 ادامعا جۇمىس بەرىپ وتىرمىن دەگەن مەكەمە باسشىلىعى قازىلعان جەردىڭ زاڭدى يەسىمىز دەپ قۇجات كورسەتتى. ونىڭ ۇستىنە قۇرىلىس تولىق اياقتالعان جوق، بىتكەن سوڭ ءبارىن قورشاپ تاستايمىز دەپ سەندىردى.

«حيميا جوق. بىزدەردە حيميا بولمايدى. تەك بوتەلكە جۋامىز، سونىڭ سۋى كەلەدى. بىزدەردە قۇجات بار. 2009 جىلى 71 سوتىق جەردى ساتىپ الدىق»، – دەدى شاراپ زاۋىتىنىڭ وكىلى اريف ابدۋللا ۇلى.

جەرگىلىكتى اكىمدىك وكىلدەرى شالقار اۋىلىندا قازىلىپ جاتقان شاراپ زاۋىتىنىڭ كارىز قۇرىلىسىن زاڭسىز دەپ وتىر. ويتكەنى اتالعان قۇرىلىسقا رۇقسات الماعانىن ايتادى.

«قۇرىلىس زاڭسىز. ەشقانداي رۇقسات قاعازى جوق»، – دەدى قاراساي اۋدانى ساۋلەت جانە قالا قۇرىلىسى ءبولىمىنىڭ باس مامانى دارمەن جاپاروۆ.

«ەكولوگيا دەپارتامەنتى كەلىپ تەكسەردى. ءبىز تۇرعىنداردىڭ ارىز-شاعىمىن الامىز. سوسىن قۇزىرلى ورگانعا حالىقتىڭ ارىزىن تىركەپ، حات جولدايمىن.بۇل كىسىلەرگە شارا قولدانادى»، – دەدى جاندوسوۆ اۋىلدىق وكرۋگىنىڭ اكىمى الماس جامبۋوۆ.

كوپشىلىك شاعىم ايتقان زاۋىتتىڭ جۇمىسى ءقازىر ۋاقىتشا توقتاپ تۇر. ەندى ونداعى جۇمىسشىلار دا جۇمىسسىز قالامىز دەپ قورقادى. ال جەرگىلىكتى بيلىك وكىلدەرى اۋىل ازاماتتارىنىڭ شاعىمىن قۇزىرلى مەكەمەلەرگە تاپسىردىق، ەندى جاۋابىن كۇتەمىز دەپ قىسقا قايىردى.