ۇكىمەت مۇشەلەرى ەلىمىزدە تۇرعىن ءۇي ساياساتى رەفورمالاناتىنىن ايتتى.
بۇل تۋرالى يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ بۇگىنگى ۇكىمەت وتىرىسىندا ءمالىم ەتتى، دەپ حابارلايدى Almaty-akshamy.kz.
«مەملەكەت باسشىسىنىڭ تاپسىرماسى اياسىندا تۇرعىن ءۇي ساياساتىن رەفورمالاۋ ماسەلەسى بويىنشا زاڭ جوباسى ازىرلەندى. اتالعان زاڭ جوباسى بۇگىنگى تاڭدا پارلامەنت ءماجىلىسىنىڭ قاراۋىندا. ونىڭ شەڭبەرىندە تۇرعىن ءۇي ساياساتىن تۇتاستاي رەفورمالاۋ جانە ونى ەكىنشى دەڭگەيدەگى بانكتەر جۇيەسىنەن شىعارا وتىرىپ، «وتباسى بانكىن» ۇلتتىق دامۋ ينستيتۋتى ەتىپ قايتا قۇرۋ ۇسىنىلادى. سونداي-اق «وتباسى بانكىنىڭ» بازاسىندا «تۇرعىن ۇيمەن قامتاماسىز ەتۋ ورتالىعىن» قۇرۋ جوسپارلانعان. ول ساناتتارعا تيەسىلىگىنە قاراماستان، رەسپۋبليكا اۋماعىندا تۇرعىن ءۇيى جوق بۇكىل مۇقتاجداردى ورتالىقتاندىرىلعان ەسەپكە الاتىن بولادى. ۇسىنىلىپ وتىرعان جاڭا مودەلدە تۇرعىن ءۇي جاعدايىن جاقسارتۋ جونىندەگى مەملەكەتتىك قولداۋ شارالارى ەسەپكە قويۋ كۇنىنە، تابىستىڭ بار-جوعىنا جانە بەرىلگەن وتىنىمگە بايلانىستى جۇزەگە اسىرىلادى»، - دەدى قايىربەك وسكەنبايەۆ.
ءمينيستردىڭ مالىمەتىنشە، بۇل جاڭاشىلدىقتار حالىقتى تۇرعىن ۇيمەن قامتاماسىز ەتۋدىڭ تيىمدىلىگىن ارتتىرۋعا، ازاماتتاردىڭ تۇرعىن ءۇي الۋ ءراسىمىن وڭتايلاندىرۋعا، سونداي-اق ازاماتتاردىڭ بارلىق ساناتتارى اراسىندا تۇرعىن ءۇيدى ءادىل ءبولۋدىڭ ءبىرىڭعاي تەتىگىن ەنگىزۋگە مۇمكىندىك بەرمەك.