ماماندار جاھاندىق جىلىنۋدىڭ قازاقستانعا تيگىزگەن اسەرىن ايتتى

كاسپيي تەڭىزىنىڭ دەڭگەيى قازىرگى كەزدە 28،68 م تومەندەگەن.

ونداعان جىلدار بويى قازاقستاندا اۋا تەمپەراتۋراسىنىڭ كوتەرىلۋ نورماسى الەم ەلدەرىنەن الدەقايدا جوعارى بولىپ وتىر. بۇل تۋرالى «قازگيدرومەت» رمك باس ديرەكتورىنىڭ ورىنباسارى سەرىك سايىروۆ ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ. 

«كەيىنگى 40 جىلدا قازاقستاندا اۋا تەمپەراتۋراسى ورتا ەسەپپەن ءار 10 جىل سايىن 0،32°س جوعارىلاپ وتىردى. بۇل جەر شارى بويىنشا اۋا تەمپەراتۋراسىنىڭ كوتەرىلۋ نورماسىنان الدەقايدا كوپ. دۇنيەجۇزىندەگى ورتاشا ءوسۋ قارقىنى 0،18°س دەڭگەيىندە، ياعني جاھاندىق جىلىنۋ دەڭگەيى الەم بويىنشا قازاقستاندا وتە جوعارى. ال، 2021 جىل ەلىمىزدەگى ەڭ جىلى بەسجىلدىققا كىرىپ وتىر. كورسەتكىش انوماليالىق وزگەرىس ەنگەنگە دەيىنگى ورتاشا جىلدىق تەمپەراتۋرادان 1،5°س ارتىق. سونداي-اق، جازدا اپتاپ ىستىقتىڭ قايتالانۋى جيىلەپ كەلەدى. قۇرعاق ايماقتارعا جاڭبىر جاۋۋ ۇزاقتىعى ارتىپ بارادى. رەسپۋبليكا بويىنشا كۇندىزگى جانە تۇنگى ايازداردىڭ جيىلىگى تومەندەي باستادى»، - دەدى سەرىك سايىروۆ. 

سونىمەن قاتار، سوڭعى 35 جىلدا قازاقستاندا گيدرولوگيالىق قۇبىلىستار دا جيىلەگەن. «قازگيدرومەت» مالىمەتىنشە، سۋ تاسقىنى ءقاۋپى ورتا ەسەپپەن 42 وقيعاعا كوبەيدى. بۇدان وزگە سەرىك سايىروۆ كاسپيي تەڭىزىنىڭ تارتىلىپ بارا جاتقانىنا توقتالدى. 

«كاسپيي تەڭىزىنىڭ دەڭگەيى قازىرگى كەزدە 28،68 م تومەندەپ، 23 مىڭ شارشى شاقىرىمعا تارتىلدى. ال، بالقاش كولىنىڭ تولقۋى 342،5 م دەڭگەيىندە. بالقاشتا شۇعىل وزگەرىستەر جوق. كاسپيي تەڭىزى قاتتى تايازداپ كەتتى»، - دەپ مالىمدەدى «قازگيدرومەت» رمك باس ديرەكتورىنىڭ ورىنباسارى. 

سەرىك سايىروۆتىڭ ايتۋىنشا، مۇنداي ەكولوگيالىق ماسەلەردىڭ سەبەبى – جاھاندىق جىلىنۋ دەڭگەيىنىڭ جوعارىلاعانى مەن قورشاعان ورتاعا دەگەن قامقورلىقتىڭ جوقتىعى.