ەلەكتروندى كىتاپحانادا ۇلتتىق كىتاپحانانىڭ 20 مىڭ قۇجاتى بار.
قولدانىستاعى اۆتورلىق قۇقىق تۋرالى زاڭ نورمالارى وقىرمانعا زاماناۋي اۆتورلاردىڭ شىعارمالارىن سيفرلىق فورماتتا تولىق وقۋعا مۇمكىندىك بەرمەي وتىر. بۇل تۋرالى قۇقىق يەلەرىنىڭ رەسپۋبليكالىق كونفەرەنسياسى بارىسىندا ق ر ۇلتتىق كىتاپحاناسىنىڭ ديرەكتورى باقىتجامال وسپانوۆا ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«اۆتورلىق قۇقىق ماسەلەسى كىتاپحانا جۇمىسىنا دا قاتىستى. ۇلتتىق كىتاپ قورىن ساقتاۋ جانە باسىلىمداردى بارىنشا قولجەتىمدى ەتۋ – ۇلتتىق كىتاپحانا مەن رەسپۋبليكا كىتاپحانالارىنىڭ باسىم باعىتتارىنىڭ ءبىرى. كىتاپ قورىن ساقتاۋدىڭ ءبىر جولى – باسپا باسىلىمدارىن سيفرلىق فورماتقا كوشىرۋ. وسىعان وراي، «سيفرلى قازاقستان» مەملەكەتتىك باعدارلاماسى اياسىندا كىتاپحانادا ەلەكتروندى كىتاپحانالاردى قالىپتاستىرۋ ءۇشىن كىتاپ قورىن اۋقىمدى سيفرلاندىرۋ جۇمىسى جۇرگىزىلىپ جاتىر»، - دەدى ق ر ۇلتتىق كىتاپحانا ديرەكتورى باقىتجامال وسپانوۆا.
بۇگىنگى تاڭدا 100 مىڭنان استام وتاندىق باسىلىم سيفرلىق فورماتقا كوشىرىلدى. ەلەكتروندى كىتاپحانادا ۇلتتىق كىتاپحانانىڭ 20 مىڭ قۇجاتى بار.
باقىتجامال وسپانوۆانىڭ ايتۋىنشا، ق ر قولدانىستاعى اۆتورلىق قۇقىق تۋرالى زاڭىنىڭ نورمالارى وقىرمانعا زاماناۋي اۆتورلاردىڭ شىعارمالارىن سيفرلىق فورماتتا تولىق وقۋعا مۇمكىندىك بەرمەي وتىر.
«كىتاپحانا قىزمەتىنە ءار كىتاپتى سيفرلاندىرۋ ءۇشىن اۆتوردىڭ نەمەسە اۆتورلىق قۇقىق يەلەنۋشىنىڭ جازباشا رۇقساتىن تالاپ ەتەتىن ۇيىمداستىرۋشىلىق-قۇقىقتىق جانە قارجىلىق سيپاتتاعى قوسالقى جۇمىستارى كەدەرگى كەلتىرۋدە. شىعارمالاردى ساندىق تۇرگە اۋدارۋعا اۆتوردىڭ كەلىسىمىنسىز ول قايتىس بولعاننان كەيىن 70 جىلدان كەيىن عانا رۇقسات ەتىلەدى. ول ۋاقىتتا بۇل ماڭىزدى بولماي قالۋى مۇمكىن. ءبىر جاعىنان، كىتاپحانالار شىعارما اۆتورلارىنىڭ قۇقىقتارىن قۇرمەتتەۋگە، ەكىنشى جاعىنان، ولاردىڭ ەڭبەگىن پايدالانۋشىلاردىڭ ءبىلىم بەرۋ، اعارتۋ جانە عىلىمي قىزمەتىنە كەڭىنەن پايدالانۋىن قامتاماسىز ەتۋگە مىندەتتى. بۇگىنگى تاڭدا ءبىز اۆتورلارمەن 700-گە جۋىق كەلىسىمشارت جاسادىق. ءبىزدىڭ ويىمىزشا، اۆتورلىق قۇقىقتى قورعاۋ سالاسىنداعى ۇلتتىق زاڭنامادا ءالى دە بولسا كىتاپحانالاردىڭ سيفرلىق ورتاداعى ماڭىزدى جانە قوعامدىق اقپاراتقا قولجەتىمدىلىك ورتالىقتارى رەتىندەگى قۇقىقتارىن كوزدەيتىن ارنايى باپ بولۋى كەرەك. ويتكەنى، بەلارۋس ەلىندە وسىنداي زاڭ قابىلدانعان»، - دەدى ول.
ءوز كەزەگىندە ق ر ادىلەت مينيسترلىگىنىڭ زياتكەرلىك مەنشىك قۇقىعى دەپارتامەنتىنىڭ ديرەكتورى ەرمەك التىنبەكوۆ 2 ماۋسىم كۇنى "زياتكەرلىك مەنشىك تۋرالى" زاڭ قابىلدانعانىن جەتكىزدى.
«ءبىز بۇل زاڭدى ەكى جىل تالقىلادىق. ماجىلىستە 27 جۇمىس توبى، سەناتتا 6 كوميتەت بولدى. ماجىلىستە زاڭ جۇرتشىلىقپەن، اۆتورلىق ۇيىمدار مەن مۇددەلى مەملەكەتتىك ورگانداردىڭ وكىلدەرىمەن تالقىلاندى. زاڭ زياتكەرلىك مەنشىك قۇقىقتارىن جانە ونەركاسىپتىك مەنشىك وبەكتىلەرىن قورعاۋدى كۇشەيتۋ شارالارىن قاراستىرادى. سونداي-اق ۇلتتىق زاڭناما زياتكەرلىك مەنشىك قۇقىقتارىن قورعاۋ سالاسىنداعى حالىقارالىق نورمالار مەن تاجىريبەلەردىڭ ەرەجەلەرىنە سايكەستەندىرىلدى»، - دەدى ەرمەك التىنبەكوۆ.
سونىمەن قاتار، شاراعا جينالعاندار زياتكەرلىك مەنشىك قۇقىقتارىن ءىس جۇزىندە قولدانۋ، شىعارماشىلىق قىزمەت ناتيجەلەرىن جاساۋ مەن پايدالانۋدى قۇقىقتىق رەتتەۋ، سونداي-اق ولاردىڭ ەكونوميكامەن، اقپاراتتىق قوعاممەن ءوزارا ارەكەتتەسۋى، سيفرلاندىرۋ، ساۋلەت، باسپا ءىسى جانە تاعى باسقا تاقىرىپتار بويىنشا اۋقىمدى ماسەلەلەردى قوزعادى.
ايتا كەتەيىك، كونفەرەنسياعا كومپوزيتورلار، ورىنداۋشىلار، فوتوگرافتار، جۋرناليستەر، كينورەجيسسەرلار، پروديۋسەرلەر، باسپاگەرلەر، اۆتورلىق قۇقىق يەلەرى، قازاقستاننىڭ بيزنەس وكىلدەرى قاتىستى.