قالاعا 335 ەلەكتر جانە گاز اۆتوبۋستارى ساتىپ الىندى.
ماماندار قازاقستان استاناسى مەن الماتىنىڭ ەكولوگياسىن جاقسارتۋ ءۇشىن قانداي شارالاردى ىسكە اسىرىپ جاتقاندارىن ايتتى، دەپ حابارلايدى Almaty-akshamy.kz.
«2020-2021 جىلدار ارالىعىندا ەكولوگيا، گەولوگيا جانە تابيعي رەسۋرستار مينيسترلىگى نەگىزگى ەكولوگيالىق پروبلەمالاردى تالقىلاۋ بويىنشا حالىقپەن بىرنەشە كەزدەسۋلەر وتكىزدى. تالقىلاۋ قورىتىندىسى بويىنشا، 5 بلوكتان جانە 22 ءىس-شارادان تۇراتىن ەكولوگيالىق جاعدايدى جاقسارتۋ بويىنشا، ياعني اتموسفەرالىق اۋا ساپاسىن ارتتىرۋ، اۋا اينالىمىن جاقسارتۋ، گازداندىرۋ، اۆتوكولىك، كوگالداندىرۋدى ودان ءارى جانداندىرۋعا بايلانىستى جول كارتاسى ازىرلەنىپ، بەكىتىلدى»، - دەلىنگەن ەكولوگيا مينيسترلىگىنىڭ باسپا ءسوز قىزمەتىنىڭ حابارلاماسىندا.
مامانداردىڭ ايتۋىنشا، بۇگىنگى كۇنى جول كارتاسىندا قاراستىرىلعان 22 ءىس-شارانىڭ 13ء-ى ورىندالدى. مىسالى، نۇر-سۇلتان قالاسى بويىنشا 1-جەو جانە 2-جەو-عا سۋ جىلىتۋ قازاندىقتارىن تابيعي گازعا اۋىستىرۋ جانە ىسكە قوسۋ ارقىلى گاز قۇبىرلارىن تارتۋ جۇمىستارى اياقتالدى.
گازداندىرۋ بويىنشا ەلوردادا 1ء-شى كەزەكتەگى جۇمىستار اياقتالدى، تولىق گازداندىرۋدى 2023 جىلى اياقتاۋ جوسپارلانىپ وتىر.
الماتى قالاسى بويىنشا 2-جەو جانە 3-جەو قازاندىقتاردى گازعا اۋىستىرۋ ارقىلى جاڭعىرتۋ تۋرالى شەشىم قابىلداندى. «قورشاعان ورتاعا اسەردى بارىنشا ازايتا وتىرىپ، الماتى 2-جەو جاڭعىرتۋ» جوباسىنىڭ تەن-ىنە وڭ قورىتىندى الىندى جانە جوبانى ىسكە اسىرۋ بويىنشا جۇمىس باستالدى. بۇل شىعارىندىلاردى 83% - عا، ياعني 37،8-دەن 6،0 مىڭ تونناعا دەيىن قىسقارتۋعا مۇمكىندىك بەرەدى.
سونىمەن قاتار، اتموسفەراعا زياندى شىعارىندىلاردى ازايتۋ ءۇشىن الماتىدا ديزەلدىك قوعامدىق كولىك ساتىپ الۋعا تىيىم سالىندى جانە 335 ەلەكتر جانە گاز اۆتوبۋستارى ساتىپ الىندى. جانە جانارماي قۇيۋ ستانسيالارىنداعى وتىن ساپاسىنا جانە جالپى اۆتوكولىكتى تەحنيكالىق بايقاۋدان وتكىزۋگە قويىلاتىن تالاپتار كۇشەيتىلدى. كىرۋ جانە شىعۋ جولدارىندا 21 «سەرگەك» جۇيەسى بەكەتتەرى جانە 19 ەكوپوست ورناتىلعان، ولار الماتى قالاسىنىڭ پوليسيا دەپارتامەنتىنە شىعارىندىلاردى تىركەۋ جانە دەرەكتەردى بەرۋ ءۇشىن «سەرگەك» جۇيەسىمەن بىرىكتىرىلگەن.
اۋماقتاردى كوگالداندىرۋ بويىنشا اكىمدىكتەر جاسىل جەلەكەردى تولىقتاي تەسەرەدى، قالانىڭ جاسىل جەلەكتەرىنىڭ ءتىزىلىمى ەنگىزىلەتىن بولادى، وندا جاسىل جەلەكتەردىڭ تيپتەرى، تۇرلىك قۇرامى، الاڭىنىڭ كولەمى، جاي-كۇيى جانە ورنالاسۋى تۋرالى دەرەكتەر تۇراقتى نەگىزدە جاڭارتىلاتىن بولادى. ءتيىستى زاڭناماعا اعاشتاردى زاڭسىز كەسۋ ەرەجەلەرىنە وزگەرىستەر ەنگىزىلدى، ول بويىنشا اعاشتاردى زاڭسىز كەسكەنى ءۇشىن جيىرما جانە وتىز ەسە مولشەردە وتەمدىك اعاش وتىرعىزۋ كوزدەلگەن، ال ولاردىڭ زاڭسىز كەسىلگەنى ءۇشىن اكىمشىلىك جازا بەس ەسەگە دەيىن ۇلعايتىلدى.
ايتا كەتۋ كەرەك، جەل اعىنىن زەرتتەۋ ماقساتىندا الماتى قالاسىنىڭ اكىمدىگى جەل رەجيمىن زەرتتەۋدى كومپيۋتەرلىك مودەلدەۋ بويىنشا ەكسپەريمەنتتىك جۇمىس باستادى، سونداي-اق جەل باعىتىن ەسكەرە وتىرىپ، قۇرىلىستىڭ باس جوسپارىنا وزگەرىستەر ەنگىزۋ بويىنشا ۇسىنىستار ازىرلەنۋدە.
وسىلايشا، جاڭا ەكولوگيالىق كودەكسكە سايكەس اكىمدىكتەر ەندى اتموسفەرالىق اۋا ناشارلاعان جاعدايدا 3 جىل ىشىندە كولىك قۇرالدارىنىڭ كىرۋىنە شەكتەۋلەر ەنگىزۋ، ال قولايسىز مەتەوجاعدايلار تۋىنداعان كەزدە، اتموسفەرالىق اۋاعا لاستاۋشى زاتتاردىڭ شىعارىلۋىن رەتتەۋ جونىندەگى ۋاقىتشا شارالاردى ەنگىزۋ وكىلەتتىكتەرىنە يە.