كوكتەمگى اۋا رايىنىڭ توسىن سىيى دا بولۋى مۇمكىن.
«قازگيدرومەت» رمك ماماندارىنىڭ بولجاۋىنشا، كوكتەمدە اۋا تەمپەراتۋراسىنىڭ وڭ انومالياسى بار كۇندەر كوبىرەك بولادى، دەپ حابارلايدى Almaty-akshamy،kz Turkystan.kz سىتەمە جاساپ.
اتاپ ايتقاندا، ناۋرىزدا اۋانىڭ ورتاشا تەمپەراتۋراسى رەسپۋبليكانىڭ باسىم بولىگىندە نورمادان 1-2°س جوعارى، باتىس قازاقستان وبلىسىندا، اتىراۋ وبلىسىنىڭ سولتۇستىك-باتىسىندا نورماعا جۋىق بولادى دەپ بولجاندى.
ال ءساۋىر ايىندا ەلىمىزدىڭ بارلىق اۋماعىندا اۋا تەمپەراتۋراسى نورمادان 1°س جوعارى بولماق. باتىس قازاقستان وبلىسىندا، شىعىس قازاقستان وبلىسىنىڭ باسىم بولىگىندە، الماتى وبلىسىنىڭ وڭتۇستىك-شىعىسىندا نورما شاماسىندا.
الايدا، كوكتەمگى اۋا رايىنىڭ توسىن سىيى دا بولۋى مۇمكىن. سەبەبى وتپەلى ماۋسىمدا سينوپتيكالىق پروسەستەر وتە تۇراقسىز كەلەدى. وسىلايشا، سۋىق اۋا ماسساسىنىڭ اعىنى قارلى بوران تۋدىرىپ، سولتۇستىك ايماقتارعا اسەر ەتۋى مۇمكىن. اركتيكالىق انتيسيكلونداردىڭ كىرۋىمەن وڭتۇستىك ايماقتاردا دا اياز بولۋى عاجاپ ەمەس.
مامىردا ەلىمىزدىڭ باسىم بولىگىندە اۋانىڭ ورتاشا ايلىق تەمپەراتۋراسى كوپ جىلدىق نورماعا جۋىق بولادى. دەگەنمەن، ءبىرقاتار وبلىستاردا، اسىرەسە، ەلدىڭ سولتۇستىك، ورتالىق جانە شىعىس وڭىرلەرىندە مامىر كۇندەرى اۋا تەمپەراتۋراسى كليمات نورماسىنان 1°س تومەن بولادى. بۇعان ءسىبىر اۋداندارىنان كەلەتىن سۋىق اۋا اسەر ەتپەك.
سينوپتيكتەر ناۋرىزدا قازاقستاننىڭ باسىم بولىگىندە جاۋىن-شاشىننىڭ مولشەرى نورماعا جۋىق، ال ەلدىڭ سولتۇستىك-باتىس بولىگىندە نورمادان ارتىق بولادى دەپ بولجايدى.
ساۋىردە جاۋىن-شاشىن مولشەرى رەسپۋبليكانىڭ باسىم بولىگىندە، ەلىمىزدىڭ باتىسىندا، قيىر سولتۇستىگىندە، شىعىس قازاقستان جانە الماتى وبلىستارىنىڭ وڭتۇستىك-شىعىس جارتىسىندا، تۇركىستان جانە جامبىل وبلىستارىنىڭ تاۋلى، تاۋ بوكتەرلى اۋداندارىندا نورمادان از بولادى.
مامىردا قازاقستاننىڭ باسىم بولىگىندە جاۋىن-شاشىن مولشەرى نورماعا جۋىق بولادى. ال قىزىلوردا، تۇركىستان، قوستاناي وبلىستارىنىڭ باسىم بولىگىندە، قاراعاندى وبلىسىنىڭ باتىس جارتىسىندا، جامبىل وبلىسىنىڭ سولتۇستىك-باتىس جارتىسىندا، اقتوبە وبلىسىنىڭ وڭتۇستىك-شىعىسىندا نورمادان از بولادى.