قاتەرلى ىسىك تەراپياسىنىڭ تيىمدىلىگى - ۋاقىتىلى جاسالعان دياگنوزدا
وتكەن جىلى بۇل دياگنوز 591 بالاعا قويىلعان، دەپ حابارلايدى Almaty-akshamy.kz
قازاق ونكولوگيا جانە راديولوگيا عىلىمي-زەرتتەۋ ينستيتۋتىنىڭ باسشىسى ديليارا قايداروۆانىڭ ايتۋىنشا، قاتەرلى ىسىككە شالدىققان بالالاردىڭ 40%-ىنا لەيكوز (اق قان اۋرۋى) دياگنوزى قويىلادى. بالالار ونكولوگياسىنىڭ جالپى قۇرىلىمىندا مي ىسىكتەرى، نەيروبلاستومالار، ليمفومالار جانە رەتينوبلاستومالار باسىم.
قازاق ونكولوگيا جانە راديولوگيا عىلىمي-زەرتتەۋ ينستيتۋتىنىڭ بالالار ونكولوگيا ورتالىعىندا جىلىنا 200-گە دەيىن بالا ەمدەلەدى.
«قازعزي بالالار ونكولوگياسى ورتالىعى 20 بالاعا ارنالعان. زاماناۋي قۇرال-جابدىقتاردىڭ ارقاسىندا ءبىزدىڭ ورتالىقتا بالالارعا ناقتى دياگنوستيكا جاسالىپ، ساۋلەلى جانە حيميالىق ەمدەۋ شارالارى جاسالادى. اتاپ ايتقاندا، پوزيتروندى-ەميسسيالىق توموگرافيا، ساۋلەلەندىرۋ اپپاراتى الەمدە 8 ەلدە عانا بار. توموتوتەراپيا ارنايى بالالارعا ارنالعان. ەمدەۋ شارالارىنىڭ بارلىق ءتۇرى بالالار ءۇشىن تەگىن»، – دەيدى قازاق ونكولوگيا جانە راديولوگيا عزي اق باسقارما ءتورايىمى ديليارا قايداروۆا.
ونىڭ ايتۋىنشا، بالاداعى ونكولوگيالىق اۋرۋدى انىقتاۋ وتە قيىن. سوندىقتان اتا-انالار بالالارىنىڭ دەنساۋلىعىنا وتە مۇقيات بولۋى كەرەك. قاتەرلى ىسىك تەراپياسىنىڭ تيىمدىلىگى ۋاقتىلى دياگنوزعا بايلانىستى ەكەنىن ەستە ۇستاعان ءجون.
«بۇيرەك ىسىگىن ۋلترادىبىستىق زەرتتەۋ (ۋدز) ارقىلى انىقتاۋعا بولادى. ەندى ءاربىر بالا اي سايىن ەمحانادا سكرينينگتەن ءوتۋى كەرەك. بۇل سكرينينگتەر اۋرۋدى ەرتە كەزەڭدە انىقتاۋعا مۇمكىندىك بەرەدى. ايەل ءوزىن كۇتۋى كەرەك، جۇكتىلىك كەزىندە مىندەتتى تۇردە ۋلترادىبىستىق زەرتتەۋ سكرينينگىنەن ءوتۋى كەرەك»، – دەپ اتاپ ءوتتى ونكولوگ.