«مەن شەتەلدىك ساياساتكەرلەردىڭ قازاقستاندا ورىس تىلىنە جانە وزگە دە تىلدەرگە قاتىستى ۇرەي بار دەگەن ۋاجدەرىن نارازىلىقپەن قابىلدايمىن». قازاقستان حالىقارالىق «قازاق ءتىلى» قوعامى» قوعامدىق بىرلەستىگىنىڭ ۆيسە-پرەزيدەنتى ماكسيم روجين وسىنداي پايىم ايتتى، دەپ حابارلايدى اlmaty-akshamy.kz.
«بۇگىندە ەلىمىزدە مەملەكەت تاراپىنان كەز كەلگەن ەتنوسقا ءوزىنىڭ ءتىلىن، ءوزىنىڭ مادەنيەتىن بىلۋگە بارلىق جاعدايلار جاسالعان. ونىڭ ءبىر دالەلى - ەلىمىزدە ورىس، وزبەك، اعىلشىن، نەمىس تىلىندە جۇمىس ىستەيتىن ورتا مەكتەپتەر بار. الەمدە مەملەكەتتىك بيۋدجەت قارجىسىنان بالالاردى تۋعان تىلىندە وقىتۋعا اقشا بولەتىن ەلدەر ساۋساقپەن سانارلىق شىعار. مەنىڭ ويىمشا، قازاقستان – سونداي مەملەكەتتەردىڭ ءبىرى. وعان بىزدەگى ورىس تىلىندە، اعىلشىن تىلىندە، نەمىس، وزبەك تىلدەرىندە ءبىلىم بەرەتىن مەكتەپتەر مىسال بولا الادى. سوندىقتان مەن شەتەلدىك ساياساتكەرلەردىڭ قازاقستاندا ورىس تىلىنە جانە وزگە دە تىلدەرگە قاتىستى ۇرەي بار دەگەن ۋاجدەرىن نارازىلىقپەن قابىلدايمىن. مەن تەگى ورىس قازاقستاندىق رەتىندە ونداي رەپليكالارعا جول جوق دەپ ەسەپتەيمىن. بۇل ەلىمىزدەگى شىنايى كورىنىستى بۇرمالاپ كورسەتۋ ەكەنىنە سەنىمدىمىن»، - دەدى ول قازاقستان حالقى اسسامبلەياسىنىڭ ءحححى سەسسياسىندا.
سونداي-اق، ول حالىقتىڭ مەملەكەتتىك تىلگە بەت بۇرعانىن، وسى تەندەنسيادان مەملەكەتتىك قىزمەتشىلەر دە قالىسپاۋى كەرەكتىگىن اتاپ ءوتتى.
«ءبىز ءقازىر حالىقارالىق قازاق ءتىلى قوعامى ارقىلى تىلگە ارنالعان كورنەكى جوبانى باستاپ جاتىرمىز. بۇل جوبا كورنەكى اقپارات تۋرالى زاڭىنىڭ تالاپتارىن شاعىن جانە ورتا بيزنەسكە ءتۇسىندىرىپ، ورىنداۋعا ەرىكتى تۇردە كومەكتەسەدى. قوعام قازاق تىلىنە كوشىپ جاتقاندا، بۇل تالاپ مەملەكەتتىك قىزمەتكەرلەر ءۇشىن دە كۇشەيۋى كەرەك دەپ سانايمىن. سەبەبى قازاق ءتىلى ءقازىر قوعامنىڭ نەگىزگى تىلىنە اينالىپ كەلەدى. بۇل – حالىقتىڭ تالابى. سوندىقتان مەملەكەتتىك قىزمەتشىلەر قازاق تىلىنەن تاپسىراتىن ەمتيحان ناتيجەسى ەسەپتەلۋى كەرەك دەپ ەسەپتەيمىن»، - دەدى ماكسيم روجين.