قازاقستان رەسپۋبليكاسى پارلامەنتى ءماجىلىسىنىڭ دەپۋتاتى كونستانتين اۆەرشين ۇلتتىق ۇلانىنىڭ «وڭتۇستىك» وڭىرلىك قولباسشىلىعى مەن 5571 اسكەري بولىمىنە ارنايى ىسساپارمەن كەلىپ، اسكەري قۇرىلىمنىڭ تىنىس-تىرشىلىگىمەن تانىستى.
كەزدەسۋ بارىسىندا قۇقىقتىق ءتارتىپ اسكەرىنىڭ قىزمەتتىك-جاۋىنگەرلىك مىندەتتەردى ورىنداۋ كەزىندە ەلەۋلى اسەر ەتەتىن ءبىرقاتار ماسەلەلەر ايتىلىپ، ۇلتتىق ۇلان اسكەرىنىڭ تىنىس-تىرشىلىگىنە قاتىستى قوردالانعان سۇراقتار تالقىلاندى.
ودان سوڭ حالىق قالاۋلىسى وڭىرلىك قولباسشىلىققا ىرگەلەس ورنالاسقان 5571 اسكەري ءبولىمىنىڭ جاۋىنگەرلىك ازىرلىگىمەن جانە ولاردىڭ ءۇي-جايلارى، تۇرمىس-تىرشىلىگىمەن جاقىن تانىستى. سونىمەن قاتار، ءبولىمنىڭ اسكەري تەحنيكاسىن، اتىس قارۋى مەن جەكە قۇرامنىڭ ارنايى جابدىقتارىن قاراپ ءوتتى. تۇرمىستىق ءۇي-جايلاردى، ساربازدار اسحاناسى مەن ەمدەۋ بولمەلەرى بار سانيتارلىق بولىمدەردى ارالاپ، ءتۇيىندى ماسەلەلەرگە كوڭىل اۋداردى.
ساپار بارىسىندا ءماجىلىس دەپۋتاتى قولباسشىلىق تاراپىنان ايتىلعان ماسەلەلەر باستى نازاردا بولاتىنىن، شەشىمىن تابۋىنا كۇش سالاتىنىن جەتكىزدى. سونداي-اق، قۇقىقتىق ءتارتىپ اسكەرىنىڭ جەكە قۇرامىنا الداعى ۋاقىتتا دا اسكەر مەن مەملەكەتتى نىعايتۋعا لايىقتى ۇلەس قوساتىنىنا سەنىم ءبىلدىردى.
– ەل قاۋىپسىزدىگىن قامتاماسىز ەتۋ ءۇشىن ءتول اسكەرىمىزدىڭ الەۋەتى بەرىك، شەكاراسى شەگەندەۋلى بولۋى كەرەك. بۇگىنگى كەزدەسۋدىڭ قورىتىندىسى بويىنشا اسكەردىڭ جاۋىنگەرلىك ازىرلىگىن قامتاماسىز ەتۋ، ءۇي-جايلاردى، اسكەري تەحنيكانى، قارۋ-جاراقتى جوندەۋ جونىندەگى پروبلەمالارمەن تانىستىم. ارينە، ولار بىردەن شەشىلمەيدى، ءبىراق جان-جاقتى كومەك كورسەتىلەدى. ماسەلەنى بيلىككە جەتكىزىپ، وڭ شەشىمىن تابۋعا بارىنشا كۇش سالامىز، – دەدى ك.اۆەرشين.