ءماجىلىس سايلاۋىنىڭ بيۋللەتەنىنە قانشا اقشا كەرەك؟

كەيبىر وڭىرلەردە ءتورت، ەندى بىرىندە بەس بيۋللەتەن بەرىلەدى.

وسك مۇشەسى سابيلا مۇستافينانىڭ ايتۋىنشا، بيۋللەتەندەردى دايىنداۋعا 532،2 ميلليون تەڭگە جۇمسالادى، دەپ حابارلايدى Almaty-akshamy.kz

ونىڭ ايتۋىنشا، ءماجىلىس پەن ءماسليحات دەپۋتاتتارىنىڭ سايلاۋىنا بەس ءتۇرلى بيۋللەتەن دايىندالادى. ونىڭ ەكەۋى ءماجىلىس سايلاۋىندا داۋىس بەرۋ ءۇشىن ازىرلەنەدى. كەيبىر وڭىرلەردە ءتورت، ەندى بىرىندە بەس بيۋللەتەن بەرىلەدى.

«ياعني، ەگەر ءسىز استانا تۇرعىنى بولساڭىز، سايلاۋ كۇنى ءتورت بيۋللەتەن الاسىز. ەكەۋى ءماجىلىس، ەكەۋى قالالىق ءماسليحات دەپۋتاتتارىن سايلاۋعا. ءاربىر وڭىردە سايلاۋشىلار سانى ءارتۇرلى. ءار ءوڭىر ءماسليحات سايلاۋىنا بيۋللەتەندەردى وزدەرى ازىرلەيدى. ءبىز ءماجىلىس سايلاۋىنا ەكى ءتۇرلى بيۋللەتەن دايىندايمىز»، - دەدى مۇستافينا ورتالىق سايلاۋ كوميسسياسىندا وتكەن بريفينگتە.

ول، 2023 جىلعى 1 قاڭتارداعى جاعداي بويىنشا، ەلىمىزدە 11 ميلليوننان استام سايلاۋشى بار ەكەنىن اتاپ ءوتتى. زاڭ بويىنشا، بيۋللەتەن سانى بارلىق سايلاۋشى سانىنا +1 پروسەنت ارتىق دايىندالادى.

«ءبىر بيۋللەتەندى ازىرلەۋ ورتاشا ەسەپپەن ەلىمىزدە 22 تەڭگە تۇرادى. كەيبىر وڭىرلەردە قىمبات، كەيبىرىندە ارزان. ءبىز بيۋدجەتتىك ءوتىنىمدى جوسپارلاعاندا، وسى باعانى الدىق. ناتيجەسىندە ءماجىلىس سايلاۋىنا 24 192 340 دانا بيۋللەتەن كەرەك. نەگە؟ ەلدەگى سايلاۋشىلار سانى ەكىگە كوبەيتىلەدى، ويتكەنى ەكى بيۋللەتەن دايىندالادى. وعان زاڭ بويىنشا ارتىق دايىندالاتىن ءبىر پروسەنت قوسىلادى. سول سەبەپتى بيۋللەتەن ازىرلەۋگە جۇمسالاتىن جالپى سوما - 532،2 ميلليون تەڭگە. بۇل - ءبىزدىڭ جوسپارلى ەسەپتەۋىمىز»، - دەپ ءتۇسىندىردى مۇستافينا.

وسك مۇشەلەرى الداعى سايلاۋعا دايىندالاتىن بارلىق بيۋللەتەندە «بارىنە قارسىمىن» تارماعى بولاتىنىن اتاپ ءوتتى.

ەسكە سالساق، ءماجىلىس جانە ءماسليحات دەپۋتاتتارىنىڭ سايلاۋى 19 ناۋرىزدا وتەدى. كانديداتتاردى ۇسىنۋ بۇگىن، 20 قاڭتاردا، باستالدى. قازاقستاندىقتار ساياسي پارتيالاردان كانديدات بولا الادى نەمەسە ءوزىن-وزى ۇسىنا الادى.