بۇل كوميسسيا 1920-1950 جىلدارداعى ساياسي قۋعىن-سۇرگىن قۇرباندارىن اقتاۋ ماسەلەلەرىمەن اينالىسۋدا.
ءاليحان سمايىلوۆ 12 جەلتوقساندى – الاش كۇنى دەپ بەلگىلەۋ جونىندەگى باستامانى ساياسي قۋعىن-سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيانىڭ قاراۋىنا ۇسىنباق، دەپ حابارلايدى Almaty-akshamy.kz
پرەزيدەنتتىڭ جارلىعىمەن ساياسي قۋعىن-سۇرگىن قۇرباندارىن تولىق اقتاۋ بويىنشا قۇرىلعان مەملەكەتتىك كوميسسيا جۇمىس ىستەپ جاتىر. ول كوميسسيا ءوز قۇزىرەتىنە سايكەس 1920-1950 جىلدارداعى ساياسي قۋعىن-سۇرگىن قۇرباندارىن تولىق، زاڭدى جانە ساياسي تۇرعىدان اقتاۋ ماسەلەلەرىمەن اينالىسۋدا.
«جىل سايىن «اق جول» پارتياسىنىڭ باستاماسىمەن ۇيىمداستىرىلاتىن «الاشقا تاعزىم» شەرۋى مەن جىلداعى ءداستۇر بويىنشا 31 مامىر – ساياسي قۋعىن سۇرگىن جانە اشارشىلىق قۇرباندارىن ەسكە الۋ كۇنىنە وراي جوعارى دەڭگەيدە ءىس-شارالار ۇيىمداستىرىلىپ جاتىر. الداعى ۋاقىتتا كوتەرىلگەن ماسەلە ساياسي قۋعىن-سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيانىڭ قاراۋىنا ۇسىنىلاتىن بولادى»، - دەيدى ءاليحان سمايىلوۆ.
بۇل باستامانى دەپۋتات بەرىك دۇيسەنبينوۆ كوتەرگەن بولاتىن.
ول ءوز سوزىندە «ءىس جۇزىندە حاندىق ۇلگىدەگى ىدىراپ كەتكەن قازاق مەملەكەتتىلىگىن قايتا جاڭعىرتۋدا، ياعني، بۇگىنگى تاۋەلسىزدىكتىڭ نەگىزىن قالاۋدا حح عاسىردىڭ باسىندا زاماناۋي قازاق مەملەكەتىن قۇرۋعا ۇمتىلىس جاساپ، ءبىلىم مەن قاجىر-قايراتىن سالىپ، وسى جولدا شاحيد بولعان ۇلت كوسەمدەرىنىڭ، الاش رەسپۋبليكاسى ارىستارىنىڭ ءرولىن ەرەكشە اتاپ ءوتۋىمىز كەرەك. بيىل الاش رەسپۋبليكاسىنىڭ قۇرىلعانىنا 105 جىل تولدى. ەستەرىڭىزگە سالا كەتەيىن، 29 ماۋسىمدا «اق جول» فراكسياسى بۇل داتانى مەملەكەتتىك دەڭگەيدە اتاپ ءوتۋدى تالاپ ەتكەن دەپۋتاتتىق ساۋال جولداعان بولاتىن. الايدا، ۇكىمەت بۇل ماسەلەنى وكىلەتتى مينيسترلىكتەرگە تاپسىرعانى تۋرالى جۇرە جاۋاپ بەردى. سونىمەن، وكىنىشكە قاراي، بۇل تاريحي داتا تاعى دا اتاۋسىز قالدى. بۇل مەرەيلى كۇندى تەك الاشتانۋشىلار مەن ءبىزدىڭ «اق جول» پارتياسى عانا ءتۇرلى ءىس-شارا وتكىزىپ، اتاپ ءوتتى. بۇگىندە تاريحي ادىلدىكتى ورناتاتىن كۇن جەتتى دەپ سانايمىز. تاريح تاعىلىمىن ۇرپاققا ناسيحاتتاۋ ماقساتىندا الاشتانۋشى عالىمداردىڭ باستاماسىن قولداي وتىرىپ، تاۋەلسىزدىك كۇنىنىڭ قارساڭىنداعى 12 جەلتوقساندى – تاريحي قۇجاتتارمەن دالەلدەنگەن الاش رەسپۋبليكاسىنىڭ قۇرىلعان كۇنى رەتىندە – «الاش كۇنى» دەپ رەسمي بەلگىلەۋدى جانە جىل سايىن مەملەكەتتىك دەڭگەيدە اتاپ ءوتۋدى سۇرايمىز»، - دەگەن ەدى.