جوبانىڭ ماقساتى – حالىقتى اقپاراتتاندىرۋ.
ەلىمىزدە پسيحولوگيالىق كومەككە مۇقتاج تۇرعىندار ءۇشىن ساپالى اقپاراتتىق قىزمەت كورسەتەتىن 3580 call- ورتالىعى ىسكە قوسىلدى، دەپ حابارلايدى Almaty-akshamy.kz.
ەگەر كۇيزەلىس قاجىتىپ، مازاسىز كۇي دەگبىرىڭىزدى قاشىرىپ، ومىردەن ءتۇڭىلىپ جۇرسەڭىز، 3580 نومىرىنە جەدەل حابارلاسىڭىز. بۇل جوبا «قازاقستان رەسپۋبليكاسىندا پسيحيكالىق دەنساۋلىقتى ساقتاۋدىڭ ءبىرىڭعاي اقپاراتتىق قىزمەتىن پيلوتتاۋ» دەپ اتالادى. بىلتىر 23 جەلتوقساندا الماتى، تاراز جانە سەمەي قالالارىندا call-ورتالىقتارى جۇمىسىن باستادى.
الماتى قالاسى، جامبىل جانە اباي وبلىستارىنىڭ پسيحيكالىق دەنساۋلىق ورتالىقتارى مەن وسى ءۇش ءوڭىردىڭ جاستار مەديسينالىق ورتالىقتارىنىڭ قىزمەتتەرى ءبىرىڭعاي اقپاراتتىق جۇيەگە بىرىكتىرىلىپ، حالىققا پسيحيكالىق دەنساۋلىق سالاسى بويىنشا اقپاراتتىق قىزمەت كورسەتىپ جاتىر.
«وسى جوبادا پسيحولوگيالىق كومەك كورسەتەتىن 25 مامان رەسپۋبليكالىق پسيحيكالىق دەنساۋلىق عىلىمي-پراكتيكالىق ورتالىعىندا "قاشىقتان پسيحولوگيالىق كەڭەس بەرۋدىڭ تەوريالىق جانە پراكتيكالىق نەگىزدەرى" بويىنشا ءبىلىم الىپ، كاسىبي ءبىلىمىن جەتىلدىرەتىن ترەنينگتەردە شىڭدالدى. بۇعان قوسا، سۇراق-جاۋاپ بويىنشا ماماندارعا ارنالعان ءبىلىم بازاسى ازىرلەندى. جوبا رەسپۋبليكالىق پسيحيكالىق دەنساۋلىق عىلىمي-پراكتيكالىق ورتالىعى، ۇلتتىق قوعامدىق دەنساۋلىق ساقتاۋ ورتالىعى جانە دۇنيەجۇزىلىك دەنساۋلىق ساقتاۋ ۇيىمىنىڭ قازاقستانداعى ەلدىك كەڭسەسىنىڭ تەحنيكالىق قولداۋىمەن دۇنيەگە كەلدى. ءاربىر ۇيىم ددۇ ەۋروپالىق وڭىرلىك بيۋروسىمەن كومپيۋتەرلىك تەحنيكانى وتەۋسىز تۋرالى كەلىسىمگە قول قويدى. جۇمىس ورىندارىن قۇرال-جابدىقپەن جابدىقتاۋ ماسەلەسى شەشىلدى. بۇل - تۇرعىنداردىڭ پسيحيكالىق دەنساۋلىق بويىنشا اقپاراتتى جەدەل جانە ساپالى ماعلۇماتپەن قامتاماسىز ەتۋ ماقساتىندا اشىلعان ءبىرىڭعاي ورتالىق. ءاربىر قوڭىراۋ شالعان ادام جايلى مالىمەت قۇپيا ساقتالادى. سوندىقتان قينالعاندا 3580 نومىرىنە حابارلاسىپ، پسيحولوگيالىق كومەككە جۇگىنىڭىزدەر»، - دەيدى رەسپۋبليكالىق پسيحيكالىق دەنساۋلىق عىلىمي-پراكتيكالىق ورتالىعى باس ديرەكتورى قۋانىش التىنبەكوۆ.
جوبانىڭ ماقساتى - جۇرتشىلىقتىڭ پسيحيكالىق دەنساۋلىق ساقتاۋ سالاسى بويىنشا قىزمەتكە قولجەتىمدىلىگىن ارتتىرىپ، حالىقتى اقپاراتتاندىرۋ. ءارى رەسپۋبليكالىق پسيحيكالىق دەنساۋلىق عىلىمي-پراكتيكالىق ورتالىعىنىڭ سايتىندا قاشىقتان پسيحولوگيالىق كومەك كورسەتۋ تەتىكتەرى ازىرلەنىپ جاتىر. سونىمەن قاتار پيلوتتىق جوبا اياقتالعاننان كەيىن ونىڭ قىزمەتىنە تالداۋ جاساۋ ارقىلى قىزمەتىن دامىتىپ، وسى جىلى ەلىمىزدىڭ بارلىق وڭىرىندە ءبىرىڭعاي اقپاراتتىق قىزمەتىن اشۋ جوسپارلانىپ وتىر.