سەناتتىڭ قاراۋىنا جولداندى.
«رەسپۋبليكالىق رەفەرەندۋم تۋرالى» كونستيتۋسيالىق زاڭعا وزگەرىستەر مەن تولىقتىرۋ ەنگىزۋ تۋرالى» زاڭ جوباسى ماقۇلداندى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«زاڭ جوباسى رەسپۋبليكالىق رەفەرەندۋم وتكىزۋ كەزىندە پايدالانىلاتىن بيۋللەتەن نىساندارىن بىرىزدەندىرۋ ماقساتىندا ازىرلەندى. مەملەكەت باسشىسى قازاقستان حالقى اسسامبلەياسى وتىرىسىندا كونستيتۋسياعا ەنگىزىلەتىن وزگەرىستەر بويىنشا رەسپۋبليكالىق رەفەرەندۋم وتكىزۋدى ۇسىندى. بۇل ورىندى ۇسىنىس، قوعام ءومىرىنىڭ نەعۇرلىم ماڭىزدى ماسەلەلەرىنە قاتىستى شەشىمدەردى بۇكىلحالىقتىق داۋىس بەرۋ ارقىلى شەشۋ – حالىق بيلىگىنىڭ ادىلەتتى قوعام قۇرۋىنىڭ ايرىقشا كورىنىسى»، - دەدى ءماجىلىس دەپۋتاتى بەرىك بەكجانوۆ.
ونىڭ ايتۋىنشا، زاڭ جوباسىمەن رەفەرەندۋمعا قويىلعان ماسەلەلەردى قامتيتىن بيۋللەتەندەردەگى بىردە-بىر جاۋاپ بەلگىلەنبەگەن نۇسقالارىن جارامسىز دەپ تانۋ جانە ۇسىنىلعان جاۋاپتاردىڭ بارلىق نۇسقالارى بەلگىلەنگەن بيۋللەتەندەردى جارامدى دەپ تانۋ نورمالارى ەنگىزىلەدى.
«الايدا بۇنداي بيۋللەتەندەر داۋىس بەرۋ كەزىندە ەسەپكە الىنبايدى. سونىمەن قاتار، داۋىس بەرۋشىنىڭ بيۋللەتەندە كەز كەلگەن بەلگى قويۋ ارقىلى داۋىس بەرۋ ەركى ناقتىلانادى. بۇل نورما، ءوز كەزەگىندە، داۋىس بەرۋ ءراسىمىن جۇزەگە اسىرۋ پروسەسىندە ازاماتتارعا قولايلى جاعداي جاسايدى. زاڭ جوباسىن قابىلداۋ تەرىس جانە وزگە دە كەلەڭسىز الەۋمەتتىك-ەكونوميكالىق جانە قۇقىقتىق سالدارعا اكەپ سوقپايدى جانە بيۋدجەت شىعىستارىن تالاپ ەتپەيدى»، - دەدى دەپۋتات.
پالاتا دەپۋتاتتارى تالقىلاۋدان كەيىن اتالعان قۇجاتتى ماقۇلداپ، سەناتتىڭ قاراۋىنا جولدادى.
بۇدان بۇرىن حابارلانعانداي، جاقىندا قازاقستان حالقى اسسامبلەياسىنىڭ «ەل بىرلىگى – جاڭارعان قازاقستاننىڭ تىرەگى» اتتى ءحححى سەسسياسىندا مەملەكەت باسشىسى قاسىم-جومارت توقايەۆ اتا زاڭعا وزگەرىستەر مەن تولىقتىرۋلار ەنگىزۋ جونىندە رەسپۋبليكالىق رەفەرەندۋم وتكىزۋدى ۇسىندى.