التى قازاق سۋرەتشىسى قازاق حاندىعىنىڭ حاندارىن انيمە ستيلىندە سالىپ شاققان.
ولاردىڭ ءارقايسىسى وزىنە ەرەكشە اسەر ەتكەن حاندار: جانىبەك حان، حاق-نازار حان، قاسىم حان، ابىلاي حان، بوكەي حان جانە كەنەسارى حاندى تاڭداعان، دەپ حابارلايدى Almaty-akshamy.kz
بۇل يدەيا اۆتورلارى نۇر-سۇلتاندىق ەكى سۋرەتشى – 24 جاستاعى ماعيرا تىلەۋبەردينا مەن 21 جاستاعى اقتوتا قاناتوۆا.
"ءبىز انيمە، مۋلتفيلم سياقتى ستيلدەرى ۇقساس سۋرەتشىلەر ءۇشىن كوللاب جاساپ، تاريحي تۇلعالاردى جاس، زاماناۋي ستيلدە كورسەتۋگە تىرىستىق"، – دەيدى سۋرەتشى ماعيرا.
ونەرپازدار ءار حاننىڭ تاريحىمەن تانىسىپ، وزدەرىنە ۇناعانىن تاڭداعان.
"ابىلاي حاننىڭ شىن اتى ءابىلمانسۇر، اكەم اتى – مانسۇر. ول ءوز زامانىندا وتە سيرەك ەسىم بولاتىن، ءابىلمانسۇردىڭ مىسالىندا بۇل ەسىمنىڭ قازاق ەكەنىن ۇنەمى دالەلدەپ وتىراتىن. ءسويتىپ، ابىلايحاندى تاڭدادىم، ونى تاعدىردىڭ جازۋى دەپ شەشتىم. مەن ونى وسىلاي – ادەمى، كۇشتى جانە بۇل دۇنيە تۋرالى ءبارىن بىلەتىن سياقتى مەيىرىمدى كۇلىمسىرەگەن قالپىندا ەلەستەتەمىن. ابىلاي حاننىڭ مىنەزىن وسىلاي جەتكىزگىم كەلدى"، – دەيدى ماعيرا تىلەۋبەردينا.
ابىلاي حان (ءابىلمانسۇر) – قازاقتىڭ مەملەكەت جانە ساياسي قايراتكەرى، قازاق حاندىعىنىڭ حانى، جوڭعارلارعا قارسى ازاتتىق سوعىستىڭ باتىرى. ابىلاي حان قازاق حالقىنىڭ اۋىز ادەبيەتىن جاقسى بىلەتىن، دارىندى كۇيشى رەتىندە دە بەلگىلى.
ال اقتوتى قاناتوۆا قاسىم حاندى تاڭداعان. تاعى ءبىر ونەرپاز، الماتىلىق 19 جاستاعى انەليا بەكباسوۆا ءقازىر چەحيادا ءبىلىم الىپ جاتىر. ول بوكەي حاننىڭ سۋرەتىن سالعان.
سۋرەتشى بوكەي حان بەينەسىن ستيحيالى تۇردە تاڭداعانىن اتاپ ءوتتى.
"مەن ءبىزدىڭ ۇرپاق ونەردى پايدالانا وتىرىپ، ۇلتتىق مادەنيەت پەن تاريحتى تەرەڭىرەك اشۋعا تىرىسىپ جاتقانىن ماقتان تۇتامىن"، – دەيدى انەليا.
بوكەي حان – بوكەي ورداسىنىڭ نەگىزىن سالۋشى جانە العاشقى بيلەۋشىسى. ءابىلقايىر حاننىڭ نەمەرەسى، نۇرالى حاننىڭ ۇلى.
جوباعا قازاقستاندىق باسقا ونەرپازدار دا قاتىسقان. سونىمەن، رەجيسسەر-انيماتور سالتانات ەرسۇلتان جانىبەك حاننىڭ سۋرەتىن سالعان.
جانىبەك حان – كەرەي حاننان كەيىنگى قازاق ورداسىنىڭ بيلەۋشىسى. جانىبەك پەن كەرەي – قازاق حاندىعىنىڭ نەگىزىن سالۋشىلار.
سۋرەتشى ايجان جومارت قىزى حاق-نازار حاندى سالعان.
حاق-نازار حان – قاسىم حاننىڭ ۇلى. حاق-نازار ەسىمى قازاق حاندىعىنىڭ ىشكى جانجالداردان كەيىن قايتا جاندانۋ كەزەڭىمەن بايلانىستى، ونىڭ تۇسىندا مەملەكەتتىڭ ىشكى جانە سىرتقى ساياساتىندا ورلەۋ بولدى.
سۋرەتشى نۇرگۇل ءداۋىتوۆا كەنەسارى حاندى انيمە ستيلىندە سالعان.
كەنەسارى حان – قولباسشى، ابىلاي حاننىڭ نەمەرەسى. قازاق تاريحناماسىندا 1841 جىلدان باستاپ قازاقتىڭ سوڭعى حانى بولعان.
سۋرەتشىلەر تاريحتى ەسكە ءتۇسىرىپ، ونى زاماناۋي ۇلگىدە بايانداۋ باستى مىندەت ەكەنىن اتاپ ءوتتى. وسىلايشا ولار قازاقستاندىق جاستاردىڭ نازارىن تاريحقا اۋدارعىسى كەلەدى.