قازاقستان رەسپۋبليكاسى پارلامەنتى ءماجىلىسىنىڭ دەپۋتاتى، الەۋمەتتىك-مادەني دامۋ كوميتەتىنىڭ مۇشەسى جاناربەك ءاشىمجان الماتىداعى مەترو بەكەتتەرىنىڭ اتاۋىن وزگەرتۋ جاستاردىڭ ءپاتريوتيزمىن دامىتۋعا سەپتىگىن تيگىزەتىنىنە سەنىمدى دەپ حابارلايدى almaty-akshamy.kz
الماتىدا مەتروستانسالاردىڭ قۇرىلىسى جالعاسۋدا. ءماسليحات دەپۋتاتتارى قالا اكىمى باقىتجان ساعىنتايەۆتىڭ «دوستىق» پەن بولاشاقتا «زاپادنىي» اۆتوۆوكزالى اتالۋى ءتيىس بەكەتتەرىن وزگەرتۋ تۋرالى ۇسىنىسىن قولدادى. ولاردى «ب. مومىش ۇلى» جانە «قاراساي» اتاۋ ۇسىنىلدى.
«بۇل دۇرىس شەشىم! ءبىز باتىر، كورنەكتى جازۋشى باۋىرجان مومىش ۇلىنىڭ ەسىمىن ۇلىقتاۋىمىز كەرەك. اسكەري ويشىل جانە تەورەتيك پولكوۆنيك مومىش ۇلىنىڭ ەسىمى فاشيستىك گەرمانيانى جەڭۋگە ۇلەس قوسقان ۇلى وتان سوعىسىنىڭ اسكەري باسشىلارىنىڭ قاتارىندا»، - دەدى ءماجىلىس دەپۋتاتى.
ج. ءاشىمجاننىڭ ايتۋىنشا، ۇلتتىق تاريحي ەپوستا قازاقستاننىڭ باتىرلارى جارقىن تۇلعالار رەتىندە بەرىلگەن. سوندىقتان وتكەن عاسىرلاردا بەينەسى وشپەگەن باتىر قاراساي باتىردىڭ قۇرمەتىنە باسقا بەكەتتىڭ اتىن بەرۋ ءادىل بولار ەدى.
«مەن الماتىنىڭ باتىس قاقپاسى قاراساي اۋدانىمەن شەكتەسەتىنىن اتاپ وتكىم كەلەدى، سوندىقتان قاراسايدىڭ ەسىمى مەترو ستانساعا بەرىلۋى ورىندى»، - دەيدى حالىق قالاۋلىسى جاناربەك ءاشىمجان.
دوستىق بەكەتى اباي داڭعىلى مەن مومىش ۇلى كوشەسىنىڭ قيىلىسىندا سالىنىپ جاتىر. ونىڭ تەحنيكالىق ىسكە قوسىلۋى وسى جىلدىڭ سوڭىنا جوسپارلانعان. «زاپادنىي» اۆتوۆوكزال بەكەتى الماتى وبلىسى قاراساي اۋدانىنىڭ شەكاراسىندا سالىنادى.
بەلگىلەنگەن ءتارتىپ بويىنشا اكىمدىكتىڭ قاۋلىسى مەن الماتى قالاسى ءماسليحاتىنىڭ شەشىمى رەسپۋبليكالىق ونوماستيكالىق كوميسسياعا جىبەرىلەدى، وندا تۇپكىلىكتى شەشىم قابىلدانادى.