ءماجىلىس دەپۋتاتى ماقسات تولىقباي انشىلەردىڭ فونوگراممامەن ءان ايتۋىنا قارسى شىقتى.
دەپۋتات كونسەرتكە بيلەت العان تىڭدارمانننىڭ الدىندا انشىلەر جاندى داۋىستا ءان شىرقاۋى ءتيىس دەپ ەسەپتەيدى، دەپ حابارلايدى aqshamnews.kz.
بىلەسىزدەر، بىزدەگى قولدانىستاعى زاڭ بويىنشا انشىلەر فونوگراممانى پايدالانعان كەزدە كونسەرت ۇيىمداستىرۋشىلارى ول تۋرالى كورەرمەندەردى حاباردار ەتۋگە مىندەتتى. بۇگىنگى ءانشى اۋزىن جىبىرلاتىپ، فونوگراممامەن ايتادى دەپ ايتىلۋى ءتيىس. ءبىراق ول ەرەجە بىزدە مۇلدەم جۇمىس ىستەمەيدى. سوندىقتان ءبىز بۇل زاڭ جوباسىنا فونوگراممانى پايدالانۋعا تىيىم سالۋ تۋرالى تۇزەتۋلەر ەنگىزۋدى ۇسىندىق. ءبىراق مينيسترلىك مۇنى قولداپ وتىرعان جوق. ايتاتىن سىلتاۋ كوپ. وڭىرلەردە تەحنيكالىق قۇرالداردىڭ 70 پايىزى توزعان دەيدى. ءبىراق ءبىز نورمانى تاعى دا جەڭىلدەتىپ، مىناداي مەحانيزم ۇسىندىق، - دەيدى دەپۋتات.
الايدا مينيسترلىك تاراپىنان بۇل ۇسىنىس تا قولداۋ تاپپاعان.
كونسەرت زالى تەحنيكالىق قۇرالدارمەن تولىق قامتاماسىز ەتىلسە، فونوگراممانى پايدالانۋعا تىيىم سالىنادى دەدىك. ءبىراق بۇل نورما دا وتكەن جوق. مەن ءبىر ءانشىنىڭ ءانىن تىڭداعىم كەلسە، YouTube-تان دا تىڭداي الامىن، ديسكىسىن ساتىپ الىپ، كولىگىمدە وتىرىپ تىڭدايمىن. ءبىراق اقشاسىن تولەپ، كونسەرتكە بارعان كورەرمەن نەگە فونوگراممامەن تىڭداۋى ءتيىس؟ بۇل تالاپ ورىندى دەپ ويلايمىز. ەكىنشىدەن، بىزگە ايتىلىپ وتىرعان تاعى ءبىر سىلتاۋ – بىلىكتى دىبىس رەجيسسەرلەرى جەتىسپەيدى دەيدى. ەندى سۇرانىس بولماعاندىقتان، ارينە، جەتىسپەيدى. فونوگراممانى الىپ تاستاسا، ەڭ قىمبات گونوراردى دىبىس رەجيسسەرلارى الار ەدى. بۇل دا قيىن دەگەن سوڭ جەڭىل نورما ۇسىندىق. ەگەر ورىن جەتكىلىكتى تۇردە جابدىقتالماعان جانە كونسەرتتەرگە بەيىدەلمەگەن بولسا، وندا اۋديتوريا حاباردار ەتە وتىرىپ، فونوگرامماعا رۇقسات ەتىلەدى دەدىك. ءبىراق بۇعان دا قارسى بولىپ وتىرسىزدار، - دەيدى ماقسات تولىقباي.