ءىس-شارادا دەپۋتاتتار ماجىلىستەگى وزگەرىستەر، زاڭناما جانە پرەزيدەنتتىڭ رەفورمالارى قالاي قولدانىسقا ەنگىزىلەتىنى تۋرالى ايتىپ بەردى.
الەۋمەتتىك قىزمەتتەر ۇيىندە ق ر پارلامەنتى ءماجىلىسىنىڭ دەپۋتاتتارى ەرلان ستامبەكوۆ، ايدوس سارىم جانە سەرگەي پونوماريەۆ الماتى قالاسىنىڭ قوعامدىق كەڭەسىنىڭ وكىلدەرىمەن كەزدەسۋ وتكىزدى، دەپ حابارلايدى Almaty-akshamy.kz
كەزدەسۋ بارىسىندا ءماجىلىس دەپۋتاتى سەرگەي پونوماريەۆ قوعامدىق كەڭەس جۇمىسىنىڭ ماڭىزدىلىعىن اتاپ ءوتتى. ونىڭ پايىمداۋىنشا، بۇل ۆەدومستۆو تەك قالانىڭ عانا ەمەس، وندا جۇمىس ىستەيتىن ادامداردىڭ دا دامۋىنا سەرپىن بەرەتىنىن ايتا كەلىپ، بۇگىنگى تاڭدا ءبىرقاتار قوعامدىق كەڭەس مۇشەلەرىنىڭ ءماسليحات پەن ءماجىلىستىڭ دەپۋتاتتارى بولعانىن تىلگە تيەك ەتتى. سونداي-اق، ول پارلامەنتتە زاڭداردىڭ قالاي قابىلداناتىنى تۋرالى باياندادى.
حالىق قالاۋلىسى ەرلان ستامبەكوۆتىڭ ايتۋىنشا، جاڭا دەپۋتاتتىق كورپۋس ناقتى ناتيجەگە باعىتتالعان. كەزدەسۋدە قازاقستاندىقتاردىڭ نەسيە تۋرالى زاڭىنا وزگەرتۋلەر ەنگىزۋدى ۇسىنعانى جونىندە ايتىپ ءوتتى.
«مەن وسى زاڭنىڭ باستاماشىسى بولدىم. ءقازىر نەسيە بەرۋ ەرەجەلەرى كۇشەيتىلىپ جاتقانىن كورىپ وتىرمىن. سونداي-اق، زاڭعا قول قويىلعاننان كەيىن بىردەن جەدەل جانە ءتيىمدى وزگەرىستەر ەنگىزىلدى»، – دەيدى ە.ستامبەكوۆ.
ال ءماجىلىس دەپۋتاتى ايدوس سارىم دەپۋتاتتاردىڭ وبلىستىق، اۋداندىق جانە قالالىق ءماسليحاتتاردىڭ قىزمەتىن وڭتايلاندىرۋ مىندەتىن قويىپ وتىرعانىنا توقتالدى.
«ءبىز حالىقتىڭ شالعاي قالالارعا بارۋدىڭ ورنىنا جەرگىلىكتى جەرلەردە پروبلەمالاردىڭ شەشىمىن تابۋى ءۇشىن ەنەرگيانى دۇرىس باعىتقا باعىتتاعىمىز كەلەدى. بۇل باعىتتا الماتىدا ەشقانداي پروبلەما جوق. ويتكەنى، مۇندا وتە بەلسەندى ءماسليحات پەن قوعامدىق كەڭەس بار، ءبىراق جالپى قازاقستان بويىنشا بۇل ماسەلە اقساپ تۇر. ونى شەشۋ ءۇشىن ءبىز ءقازىر سەناتتا قارالىپ جاتقان قوعامدىق باقىلاۋ تۋرالى زاڭ ازىرلەدىك»، - دەدى ا.سارىم.
كەزدەسۋ سوڭىندا وسىنداي تالقىلاۋلاردى تۇراقتى تۇردە وتكىزۋ قاجەتتىگى ايتىلدى.