ءماجىلىس دەپۋتاتتارى ەل ارالاۋعا شىقتى

ءبىر توپ ءماجىلىس دەپۋتاتى الماتى وبلىسىن ارالاپ، حالىقپەن كەزدەسۋلەر وتكىزۋدە

الماتى وبلىسىنىڭ جامبىل اۋدانىنا بارعان حالىق قالاۋلىلارى قوعامدىق قابىلداۋ وتكىزىپ، تۇرعىنداردىڭ وزەكتى ماسەلەلەرىن تىڭدادى، دەپ حابارلايدى Almaty-akshamy.kz قازاقپاراتقا سىلتەمە جاساپ. 

176 مىڭنان استام حالقى بار اۋداندا ءالى دە شەشىمىن تاپپاعان وزەكتى ماسەلەلەر جەتكىلىكتى. اتاپ ايتقاندا، كوپ بالالى انالاردىڭ اتاۋلى الەۋمەتتىك كومەك الۋ توڭىرەگىندە تۇسىنبەۋشىلىكتەر بار. سونداي-اق اۋىز سۋ جۇيەسىمەن قامتىلماعان، كوشەسىنە اسفالت توسەلمەگەن ەلدى مەكەندەر بار. جول قۇرىلىسى، كوشى-قون ماسەلەلەرى دە نازاردان تىس قالعان جوق. دەپۋتاتتار ۇكىمەتكە ساۋال جولداپ، جەرگىلىكتى اتقارۋشى بيلىكپەن بىرلەسە وڭ شەشىم شىعارۋعا سەنىم ءبىلدىردى.

«اتاۋلى الەۋمەتتىك كومەك ماسەلەلەرى بويىنشا كوپ بالالى انالار كەلىپ جاتىر. زاڭ جۇزىندە قالاي ەكەنىن بىلمەيدى. سونىڭ جولىن كورسەتىپ جاتىرمىز. ماقسات - ناقتى-ناقتى ماسەلەلەردى وسى جەردە شەشۋ. شەشە الماي قالعان جاعدايدا، دەپۋتاتتىق ساۋال جولداپ، سول ماسەلەلەردى شەشۋگە دايىنبىز»،- دەدى ق ر پارلامەنتى ءماجىلىسىنىڭ دەپۋتاتى ءاليا ابسەمەتوۆا.