وعان قوسا ۆينتوۆكا مەن پنيەۆماتيكالىق تاپانشا دا بار.
الماتىدا 5 مىڭ ءوق-دارى مەن تانكىگە قارسى جاۋىنگەرلىك سناريادتار تاركىلەندى، دەپ حابارلايدى Almaty-akshamy.kz
Tengrinews.kz حابارلاۋىنشا، ىشكى ىستەر مينيسترلىگى قاڭتارداعى جاپپاي تارتىپسىزدىك كەزىندە ۇرلانعان قارۋدى ىزدەۋ جۇمىستارى قالاي ءجۇرىپ جاتقانىن ايتتى.
بۇگىنگى تاڭدا 1 006 دانا قارۋ مەن 20 307 ءوق-دارى تاركىلەنگەن.
«ماسەلەن، جەدەل ءىس-شارالار بارىسىندا الماتىنىڭ "شاڭىراق-2" ىقشاماۋدانىندا ەكى ادام ۇستالىپ، ولاردان تاپانشانىڭ (2880 دانا) جانە اۆتوماتتىڭ (2160 دانا) 5 مىڭ پاترونى بار مىرىش جاشىكتەرى، قورعانىش كەۋدەشەلەر، قالقاندار مەن تىزەقاپتار سياقتى قۇرالدار، 2 تانكىگە قارسى جاۋىنگەرلىك سنارياد، تەگىس ۇڭعىلى مىلتىق، 7 پنيەۆماتيكالىق ۆينتوۆكا، ونىڭ ىشىندە بىرەۋىنىڭ وپتيكالىق كوزدەۋىشى بار جانە پنيەۆماتيكالىق تاپانشا تاركىلەندى»، - دەدى ءىىم تەرگەۋ دەپارتامەنتىنىڭ باستىعى سانجار ءادىلوۆ وكق بريفينگىندە.
ءادىلوۆ قارۋ-جاراق دۇكەندەرى قالاي تونالعانىن دا ايتتى.
«الماتىداعى جاپپاي تارتىپسىزدىك كەزىندە ءبىر توپ كۇدىكتى «ورۋجەينيك» اڭشىلىق دۇكەنىنە جەڭىل اۆتوكولىكپەن كەلىپ، ەسىگىن بۇزىپ، 15 تەگىس ۇڭعىلى مىلتىق پەن 4 ويىق كارابيندى، ونىڭ ىشىندە وپتيكالىق كوزدەۋىشى بار كارابيندى ۇرلاپ كەتكەن. ۇرلانعان قارۋ الماتى قالاسى مەن الماتى وبلىسىنىڭ اۋماعىندا ارنايى جابدىقتالعان جەردە زاڭسىز ساقتالعان. سونداي-اق، الماتىدا جاپپاي تارتىپسىزدىككە قاتىسۋشىلاردىڭ ءبىرى ۇستالدى، ول تۇندە بەلگىسىز ءۇش اداممەن بىرگە ەكى جەڭىل كولىكپەن «كامەرات» دۇكەنىنە بارىپ، قارۋ-جاراق ۇرلاپ كەتكەن»، - دەدى ول.
ونىڭ ايتۋىنشا، ۇرلانعان زاتتاردىڭ ءبىر بولىگى، ونىڭ ىشىندە وق-دارىلەرى بار 8 تەگىس ۇڭعىلى مىلتىق تۇرعىن ءۇيدىڭ شاتىرىنان تابىلىپ، تاركىلەنگەن. تاعى ءبىر جەردەن پوليسيا قىزمەتكەرلەرى تارتىپسىزدىك كەزىندە پايدالانىلعان زاتتاردى - وق-دارىلەرى بار سيگنال ريەۆولۆەرىن، جانعىش قوسپاسى بار 4 شىنى بوتەلكەنى، گاز ماسكاسىن جانە پوليسيا قىزمەتكەرلەرىنىڭ 6 ارنايى قۇرالىن تاپقان.
قىلمىسكەرلەر ۇرلانعان قارۋدى ساتپاق بولعانى دا انىقتالدى.
«18 اقپاندا جامبىل وبلىسىنىڭ بايزاق اۋدانىندا جەدەل ءىس-شارالار وتكىزۋ كەزىندە كريمينالدىق پوليسيا قىزمەتكەرلەرى ۇرلانعان كالاشنيكوۆ اۆتوماتىن ساتىپ جاتقان جەرىنەن تارازدىڭ 45 جاستاعى تۇرعىنىن ۇستادى. كۇدىكتىدەن جەكە ءتىنتۋ كەزىندە قارۋ ساتۋدان تۇسكەن 300 مىڭ تەڭگە، ال كولىك سالونىنان ءوق-دارىسى بار ەكى كالاشنيكوۆ اۆتوماتى تاركىلەندى»، - دەدى ءادىلوۆ.