ءماجىلىس دەپۋتاتتارى تاشكەنت قالاسىندا وتكەن حالىقارالىق فورۋمعا قاتىستى
ءماجىلىس دەپۋتاتتارى ءبىرقاتار حالىقارالىق فورۋمدارعا قاتىسىپ، ەلدەر اراسىنداعى پارلامەنتارالىق ىنتىماقتاستىق توپتاردىڭ جەتەكشىلەرىمەن كەزدەستى. ءماجىلىس ءتوراعاسىنىڭ ورىنباسارى بالايم كەسەبايەۆا بەينەكونفەرەنسيا ارقىلى «ورتالىق ازيا مەن اۋعانستانداعى ايەلدەردىڭ ەكونوميكالىق قۇقىقتارى مەن مۇمكىندىكتەرىن كەڭەيتۋ» تاقىرىبىنا ارنالعان تاشكەنت قالاسىندا وتكەن حالىقارالىق فورۋمعا قاتىستى، دەپ حابارلادى Almaty-akshamy.kz. پارلامەنت باسپا ءسوز قىزمەتىنىڭ حابارىنا سىلتەمە جاساپ.
وتىرىستا ءسوز سويلەگەن ۆيسە-سپيكەر قازاقستان وڭىرلىك جانە جاھاندىق دەڭگەيلەردە ايەلدەردىڭ ەكونوميكالىق مۇمكىندىكتەرىن كەڭەيتۋ ماسەلەلەرىندە ەلەۋلى كۇش-جىگەر جۇمساعانىنا توقتالىپ، قازاقستاننىڭ اۋعان جاستارىن قولداۋ باعىتىندا اتقارىپ جاتقان جۇمىستارى تۋرالى ايتتى. سونىمەن قاتار، ءماجىلىس ءتوراعاسىنىڭ ورىنباسارى پاۆەل كازانسيەۆ پەن بەلارۋس رەسپۋبليكاسى ۇلتتىق جينالىسى وكىلدەر پالاتاسىنىڭ دەپۋتاتى سۆەتلانا ليۋبەسكايا بەينەكونفەرەنسيا فورماتىندا كەزدەسىپ، قازاقستان مەن بەلارۋس اراسىنداعى ىنتىماقتاستىق ماسەلەلەرىن تالقىلادى.
تاراپتار ەكىجاقتى قارىم-قاتىناستاردى ودان ءارى نىعايتۋ ءۇشىن قازاقستاندىق جانە بەلارۋس پارلامەنتشىلەرىنىڭ ءوزارا ءىس-قيمىلىنا نازار اۋداردى. قازاقستان مەن بەلارۋس اراسىنداعى ىنتىماقتاستىقتىڭ 30 جىلى ىشىندە جوعارى دەڭگەيدە سەنىمدى ساياسي ديالوگ پەن تەرەڭ ەكونوميكالىق بايلانىستار ورناعانىن، ەكى ەل اراسىندا جان-جاقتى ءوزارا ءىس-قيمىل ءتيىمدى دامىپ كەلە جاتقانىن، سونداي-اق قاجەتتى نورماتيۆتىك-قۇقىقتىق بازا قۇرىلعانىن اتاپ ءوتتى.
ايتا كەتۋ كەرەك، وسى جىلدار ىشىندە 100-دەن استام ەكىجاقتى قۇجاتقا قول قويىلعان. سونداي-اق، ءماجىلىس دەپۋتاتتارى بىرىككەن اراب امىرلىكتەرى، پولشا جانە تۇركيا پارلامەنتتەرىمەن ىنتىماقتاستىق جونىندەگى دەپۋتاتتىق توپتار اياسىندا ونلاين-فورماتتا وسىنداي كەزدەسۋلەر وتكىزدى. سونىمەن قاتار، ءماجىلىستىڭ حالىقارالىق ىستەر، قورعانىس جانە قاۋىپسىزدىك كوميتەتىنىڭ ءتوراعاسى ايگۇل قۇسپان پارلامەنتتە سەربيانىڭ قازاقستانداعى توتەنشە جانە وكىلەتتى ەلشىسى ۆلادان ماتيچپەن كەزدەستى. وندا ەكونوميكالىق، مادەني-گۋمانيتارلىق سالالارداعى ىنتىماقتاستىق جانە پارلامەنتارالىق ديالوگتى دامىتۋ ماسەلەلەرى تالقىلاندى.