قازاقستاندا ەكولوگيالىق پروبلەمالاردى رەتتەپ جاتىر
ەكو-كىتاپتى حالىقارالىق كونسۋلتانتتاردى تارتا وتىرىپ قازاقستاندىق ساراپشىلار دايىنداعان. كىتاپتا سۋ رەسۋرستارىن باسقارۋ، اۋانىڭ لاستانۋى، قالدىقتاردى باسقارۋ، جەردىڭ توزۋى، بيوالۋانتۇرلىلىك، ەنەرگيا تيىمدىلىگى، كليماتتىڭ وزگەرۋى سەكىلدى ماڭىزدى تاقىرىپتار قامتىلعان، دەپ حابارلادى Almaty-akshamy.kz. ق ر ەكولوگيا، گەولوگيا جانە تابيعي رەسۋرستار مينيسترلىگىنىڭ تاراتقان حابارىنا سىلتەمە جاساپ.
ءىس-شاراعا كىتاپ اۆتورلارى، قورشاعان ورتانى قورعاۋمەن اينالىساتىن مينيسترلىكتەردىڭ وكىلدەرى، عالىمدار مەن ب ا ق وكىلدەرى دە قاتىستى.
سونداي-اق قاتىسۋشىلار اراسىندا ەكولوگيا سالاسىنىڭ وزەكتى تاقىرىپتارى تالقىلاندى. ەكولوگيا مينيسترلىگى ەكولوگيالىق رەتتەۋ جانە باقىلاۋ كوميتەتىنىڭ ءتوراعاسى زۇلفۇحار جولداسوۆ بۇگىنگى كۇنى وڭىرلەردەگى نەگىزگى پروبلەما اتموسفەرالىق اۋانىڭ جانە جەر ءۇستى سۋلارىنىڭ لاستانۋى ەكەنىن اتاپ ءوتتى.
«ەكولوگيالىق مونيتورينگ 2020 جىلدىڭ قورىتىندىسى بويىنشا 45 ونەركاسىپتىك قالا مەن مەگاپوليستىڭ ىشىندە 10 قالا اتموسفەرالىق اۋانىڭ جوعارى لاستانۋ دەڭگەيىنە جاتاتىنىن كورسەتتى. بۇل - نۇر-سۇلتان، الماتى، قاراعاندى، تەمىرتاۋ، اتىراۋ، اقتوبە، بالقاش، وسكەمەن، جەزقازعان جانە شىمكەنت قالالارى. لاستاۋشى زاتتار شىعارىندىلارىنىڭ جالپى كولەمى 2،5 ملن توننانى قۇرادى. جەرۇستى سۋلارىنىڭ لاستانۋىنىڭ نەگىزگى سەبەپتەرىنىڭ ءبىرى - ەسكىرگەن كارىز جانە تازارتۋ قوندىرعىلارى. 2020 جىلى ەل بويىنشا توگىندىلەردىڭ جالپى كولەمى 1،1 ملن. توننانى قۇرادى».
زۇلفۇحار جولداسوۆ ەلدەگى ەكولوگيالىق احۋالدى جاقسارتۋ ءۇشىن ونەركاسىپتە ەڭ وزىق قولجەتىمدى تەحنولوگيالاردى پايدالانۋ بولاتىنىن ايتتى. جاڭا ەكوكودەكسكە سايكەس، وزىق تەحنولوگياعا كوشۋ 2025 جىلدان باستاپ جۇزەگە اسىرىلادى.
«ءبىرىنشى كەزەڭدە (20-35) وزىق قولجەتىمدى تەحنولوگياعا شىعارىندىلاردىڭ 80%-ىن قۇرايتىن توپ-50 كاسىپورىن وتەدى. وعان جىلۋ ەنەرگەتيكاسى، مۇناي-گاز جانە حيميا ونەركاسىبى كاسىپورىندارى كىردى. ەكىنشى كەزەڭدە I ساناتتا قالعان كاسىپورىندار (2،5 مىڭنان استام كاسىپورىن) وتەدى. ەگەر كاسىپورىن وزىق تەحنولوگيانى ەنگىزبەسە، ەميسسيا ءۇشىن تولەم ستاۆكالارى بىرنەشە ەسە ارتادى».