قازاقستاندىق تانىمال وپەرا ءانشىسى مايرا مۇحامەد قىزى ونەر سالاسىنداعى ەڭبەگى ەسكەرىلمەي، ءالى كۇنگە دەيىن «حالىق ءارتىسى» اتاعىن الا الماي جۇرگەنىنە وكىنىشىن ءبىلدىردى، دەپ حابارلايدى اlmaty-akshamy.kz.
ونەر يەسى ءوزىنىڭ ەڭبەگى شەتەلدە كوبىرەك باعالانىپ، لايىقتى قۇرمەت كورسەتىلىپ جاتقانىن اتاپ ءوتتى.
«مەن استانا شابىت اكادەمياسىندا بەس جىل ۆوكالدان ساباق بەرىپ، شاكىرتتەرىم حالىقارالىق جۇلدەلەر الىپ، جەڭىسپەن ورالعاندا ەڭبەگىمدى ەشكىم باعالاعان ەمەس. سونداعى العان جالاقى 17،000 تەڭگەمەن باعالانىپتى. كۇلكىم كەلەدى ويلاسام. قايران ۋاقىت پەن سارقىلعان قۋاتىڭ دە! ال قىرعىز باۋىرلار قىرعىزستان ۇلتتىق كونسەرۆاتورياسىنىڭ پروفەسسورى اتاعىن باياعىدا بەرىپ قويعان»، - دەيدى ونەر يەسى.
ءانشىنى شەتەلدەگى ساحنالاردا «حالىق ءارتىسى» دەپ شاقىراتىن بولعان. الايدا، ول ءوزىنىڭ بۇل اتاقتى ءالى كۇنگە دەيىن الا الماعانىن جەتكىزدى.
«ال بىزدەگى اتاق جايلى ويلاۋدىڭ ءوزى جانىڭا باتادى. حالىق ءارتىسى اتاعى جاڭعىرعان بىلتىرعى ماراپاتتا ماعان نەگە بەرىلمەگەنىن ايتپاي-اق قويايىن. ەڭبەگىمدى قازاققا دالەلدەي الماي، باعالاتا الماي جارتى عاسىر ءومىر ءوتىپ بارادى. «ءومىرىڭىز الدا» دەيتىندەرگە ايتارىم: اتاڭنىڭ باسى! وسىنداي حالىقارالىق ءىس-شارالاردا مەنى “ق ر حالىق ءارتىسى” دەپ جاريالاعاندا بەتىمنەن وت شىعىپ، كوڭىل كۇيىم بۇزىلادى. بىرەۋلەر ايتقانداي: سەرتيفيكاتى جوق حالىق ءارتيسىسىڭ دەگەندە جۇرگىزۋشىگە جۇگىرىپ بارىپ «وتىنەمىن. جاي عانا سوپرانو-مايرا مۇحامەد قىزى، قازاقستان» دەپ ايتىڭىزشى» دەيمىن. ە، ءبىر كەم دۇنيە، دە!»، - دەپ قاپالانادى ءانشى.
ول جاس كۇنىندە شەتەلگە كەتپەي، ەلگە ورالعانىن اتاپ ءوتتى.
«ءبارىن ايت تا ءبىرىن ايت، لاريسا گەورگييەۆامەن 30 جىلدان سوڭ كەزدەسكەن بۇل كەش تالاي وتكەندى ەسكە سالدى. 1995 جىلى حالىقارالىق ريمسكيي-كورساكوۆ كونكۋرسىنا قاتىسقان كەزىمدە لاريسا اپام مەنى مارينسكيي تەاترعا قالساڭىزشى، ۆالەريي گەورگييەۆ جاڭا ديرەكتور بولدى. تالانتتى جاس انشىلەردى قولدايدى دەگەن ۇسىنىسىنا ورىسشا بىلمەگەنىم ءۇشىن جۇرەكسىنىپ، راقمەتىمدى ايتىپ، ەلگە ورالعان بولاتىنمىن. كەشە اپام سونى ايتىپ «ال ەندى نە بولدى؟! سەن سول كەزدە مەنى تىڭداعانىڭدا وسى كۇنى قاي جەردە جۇرەر ەدىڭ؟» دەمەس پە، جاستىق شاقتا ىستەگەن قاتەمدى ەندى ءتۇسىندىم، «بۇل تاعدىر، ماەسترو» دەگەننەن باسقا ءسوز تاپپادىم. ءيا، تاعدىر ءوز قولىڭدا! قاسىڭدا جۇرگەن دۇرىس جول سىلتەپ اقىل ايتاتىن ادام ۇستازىڭ بولسىن دەگىم كەلەدى جاستارعا!»
ايتا كەتەيىك، مايرا مۇحامەد قىزى 1965 جىلدىڭ 5 قىركۇيەگىندە قىتايدىڭ قۇلجا قالاسىندا دۇنيەگە كەلگەن. ول قازاقستان رەسپۋبليكاسىنىڭ ەڭبەك سىڭىرگەن ءارتىسى، مەملەكەتتىك سىيلىقتىڭ لاۋرەاتى اتانعان. پاريجدەگى "گراند وپەرادا" قازاقستاننىڭ اتىنان ونەر كورسەتكەن تۇڭعىش ءارى ازىرگە جالعىز وپەرا ءانشىسى.