ايەل كاسىپكەرلەرگە ارنالعان جاڭا «ءۇمىت» باعدارلاماسى ىسكە قوسىلدى. «دامۋ» كاسىپكەرلىكتى دامىتۋ قورى» اق ايەلدەردىڭ بيزنەسىن قارجىلاندىرۋعا 10 ميلليارد تەڭگە ءبولدى. بۇل باستاما ايەل كاسىپكەرلەرگە بيزنەستى دامىتۋعا كەڭ مۇمكىندىكتەر ۇسىنادى، دەپ حابارلايدى almaty-akshamy.kz
«ءۇمىت» باعدارلاماسى اياسىندا قازاقستاننىڭ بارلىق وڭىرلەرى، سونىڭ ىشىندە اۋىلدار، شاعىن جانە مونو قالالارداعى كاسىپكەر ايەلدەر ەكىنشى دەڭگەيلى بانكتەر ارقىلى نەسيە الا الادى. ينۆەستيسيا جانە اينالىم قاراجاتىن تولىقتىرۋعا بەرىلەتىن نەسيەنىڭ ماكسيمال مەرزىمى – 84 ايعا دەيىن، شەكتى سوماسى 100 ميلليون تەڭگە.
باعدارلاما ەكونوميكانىڭ بارلىق سەكتورلارىن قامتيدى، تەك قارجى جانە ساقتاندىرۋ سالاسى، جىلجىمايتىن مۇلىكپەن جاسالاتىن وپەراسيالار جانە كوتەرمە-بولشەك ساۋدا عانا كىرمەيدى.
سونىمەن قاتار، باعدارلاما اياسىندا «دامۋ» قورى ەۋروپا قايتا قۇرۋ جانە دامۋ بانكىمەن (EBRD) ارىپتەستىگى اياسىندا تەگىن وقۋ كۋرستارى مەن ترەنينگتەر ۇسىنادى. بۇل حالىقارالىق ۇيىممەن بىرلەسكەن باعدارلاما كاسىپكەر ايەلدەرگە بيزنەستى باسقارۋ جانە نارىقتاعى تابىستى باسەكەلەستىك ءۇشىن قاجەتتى كاسىبي ماشىق، ءبىلىم مەن قۇرالدارعا يە بولۋعا مۇمكىندىك بەرەدى.
«دامۋ» قورىنىڭ باسقارما ءتورايىمى گاۋحار بۋريبايەۆا اتاپ وتكەندەي، «ۇكىمەت قازاقستانداعى شاعىن جانە ورتا بيزنەستى، ونىڭ ىشىندە ايەلدەر كاسىپكەرلىگىن دامىتۋعا كوپ كوڭىل بولەدى. شاعىن جانە ورتا بيزنەس يەلەرى قۇرىلىمىنداعى ايەل كاسىپكەرلەردىڭ ۇلەسى «دامۋ» قورى قولداعان جوبالاردىڭ جالپى سانىنىڭ 47%-ىنا جەتتى. قور جۇمىس ىستەي باستاعان ۋاقىتتان بەرى ايەل كاسىپكەرلەردىڭ 96 مىڭ جوباسىنا 2 893 ملرد تەڭگە سوماسىندا قولداۋ كورسەتتى. بيزنەستەگى ارۋلار بيزنەس-يدەيالارىن جۇزەگە اسىرۋ، كومپانياسىن دامىتۋ مەن جاڭا جۇمىس ورىندارىن اشۋ ءۇشىن بەرىلگەن مەملەكەتتىك قولداۋدى ءتيىمدى پايدالاناتىنى قۋانتادى»، - دەپ مالىمدەدى.
«دامۋ» قورى – قازاقستاندا شاعىن جانە ورتا بيزنەستى دامىتۋدى كوزدەيتىن مەملەكەتتىك قولداۋ قۇرالدارىن جۇزەگە اسىراتىن قارجى اگەنتتىگى. قوردىڭ جالعىز اكسيونەرى – «بايتەرەك» ۇلتتىق باسقارۋشى حولدينگى» اق.