ەكىباستۇز قالالىق سوتى «مايقايىڭالتىن» اق اۋماعىندا بولعان اپاتتان كوز جۇمعان قۇتقارۋشىنىڭ تۋىستارىنىڭ قۇقىعىن قورعادى، دەپ حابارلايدى aqshamnews.kz.
قايعىلى وقيعا بيىل 4 قاڭتاردا بولعان. «مايقايىڭالتىنعا» تيەسىلى كەنىشتەگى شۇڭقىرعا اۆتوبۋس قۇلاعان. سالدارىنان 3 قۇتقارۋشى مەن جۇرگىزۋشى قازا تاپتى. ولار كاسىبي اسكەريلەندىرىلگەن اۆاريالىق-قۇتقارۋ قىزمەتتەرىنىڭ رەسپۋبليكالىق ورتالىعىنىڭ قىزمەتكەرلەرى بولعان.
وسى فاكتى بويىنشا ارنايى كوميسسيا جازاتايىم وقيعاعا تەكسەرۋ جۇرگىزىپ، ونىڭ قورىتىندىسى بويىنشا جۇمىس بەرۋشىنىڭ كىناسى 100%، جۇمىسكەرلەردىڭ كىناسى 0% ەكەنىن انىقتادى، – دەدى سوتتىڭ باسپا ءسوز قىزمەتى.
Pavlodarnews.kz مالىمەتىنشە، قازا تاپقان قۇتقارۋشى ولەگ تىشكيەۆيچتىڭ اناسى، قىزى، ۇلى جانە اپكەسى كومپانيا مورالدىق زياندى وتەۋى كەرەك دەپ سوتقا جۇگىنگەن. ولار قايعىلى وقيعا كەزىندە جۇمىس بەرۋشى كوڭىل ايتپاعانىن، قولداۋ كورسەتپەگەنىن اتاپ ءوتتى.
سوت بولعان جازاتايىم وقيعاعا جۇمىس بەرۋشىنىڭ 100% كىناسى بارىن ەسكەرىپ، قايتىس بولعان قۇتقارۋشىنىڭ تۋىستارىنىڭ تالاپتارىن تولىق قاناعاتتاندىردى. وسىلايشا، ءاربىر تۋىسىنىڭ پايداسىنا 30 ملن تەڭگەدەن، جالپى سوماسى 120 ملن تەڭگە مورالدىق زياندى ءوندىردى، – دەپ جازىلعان حابارلامادا.