ءماجىلىس دەپۋتاتى، سپورتشى داۋلەت تۇرلىحانوۆ ۇلىنىڭ ىس-ارەكەتىنە قاتىستى فەيسبۋكتەگى پاراقشاسىندا پىكىر ءبىلدىردى.
سوڭعى بەس ايدا الەۋمەتتىك جەلىلەردە ۇلىنا قاتىستى جاعدايعا بايلانىستى كوپ اقپارات تاراپ جاتقانىن جەتكىزدى، دەپ Almaty-akshamy.kz.
«بۇل جاعدايدىڭ بولعانى راس. الايدا ونى قوعامدىق ورتاعا قايتا-قايتا سالا بەرۋدىڭ ءجونى جوق دەپ ەسەپتەيمىن. جاعداي ورىن العاندا، ءوز پىكىرىمدى اشىق ايتقانمىن. بارلىق جاعداي زاڭ جۇزىندە شەشىلۋى كەرەك دەگەنمىن. قازىرگى كەزدە قوعامدىق ورتادا ۇلىمنىڭ ءبىر قاتەلىگىنەن باسقا قانشاما ايتىلاتىن وزەكتى ماسەلەلەر بار ەمەس پە؟! ۇلىما بايلانىستى جاعدايدىڭ قوعامدا ۇلكەن اقپاراتقا اينالعانى تۇسىنىكسىز. اقپاراتتار شىعىپ جاتىر، وسى ارقىلى حايپ جيناپ، قوعامدا رەيتينگىن وسىرەمىن دەگەندەر ءوز ماقساتىنا جەتكەن شىعار. ەندى بۇل ماسەلەنى وسى جەردەن دوعارعانىمىز دۇرىس»، - دەپ جازدى داۋلەت تۇرلىحانوۆ.
حالىق قالاۋلىسى ۇلىنىڭ ءالى جاس، ونىڭ جاساعانى ديزەرتيرلىك ارەكەت ەمەس ەكەنىن اشىق جازدى.
«بىلايشا ايتقاندا، بالالىققا سالىنىپ «ساموۆولكاعا» شىعىپ كەتكەنى. مەن ۇلىمنىڭ قازاقستان قارۋلى كۇشتەرىنىڭ ساپىندا جاۋىنگەر بولىپ جۇرگەنىن ماقتان ەتەمىن. ول جاستىقتىڭ جالىنىمەن قاتەلىك جاساعانى تۇسىنىكتى. عاشىق بولىپ جۇرگەن بالا، سۇيگەن قىزى كەلگەن ەكەن، سوعان شىعىپ كەتكەن. بۇل ەندى جاستىق سەزىم، ماحاببات سەزىمى. ارينە، مەن ونى اقتامايمىن. قاي اتا-انا ءوزىنىڭ بالاسىن جامان بولسىن دەيدى؟!»، - دەدى ول.
دەپۋتات بالاسىنا ءقازىر پسيحولوگيالىق اۋىرتپالىق ءتۇسىپ جاتقانىنا دا توقتالدى.
«قۇداي ساقتاسىن، وسى جاعداي بالامنىڭ تاعدىرىن تالكەككە سالىپ، قانداي دا ءبىر وقىس ارەكەتكە بارۋىنا سەبەپ بولسا، مەن دە ءوز تاراپىمنان قاراپ قالمايمىن، قولدانىستاعى زاڭ شەڭبەرىندە ارەكەت ەتەمىن»، - دەدى سپورتشى.
ۇلىنىڭ جاستىققا بەرىلىپ، جىبەرگەن كەمشىلىگى ونىڭ حالىق الدىنداعى ابىرويىن تۇسىرە المايتىنىن جازدى.
«بۇگىنگى كۇندەگى ابىرويىم - وراسان ەڭبەكتىڭ ارقاسىندا كەلگەن. ال مەنىڭ ۇلىممەن بولعان ءبىر عانا جاعداي – حالىق الدىنداعى ابىرويىمدى تۇسىرە المايدى. قوعامدى دۇرلىكتىرىپ، اقپارات تاراتىپ جۇرگەندەر وسىنى تۇسىنسە ەكەن دەيمىن»، - دەدى ول قازاقستاندىقتارعا جاساعان ۇندەۋىندە.
سونداي-اق، حالىق قالاۋلىسى ۇلىنىڭ ىسىنە قاتىستى ءوز ويىن ءبىلدىردى.
«تاعى دا قايتالاپ ايتقىم كەلەدى، ۇلىما قاتىستى تەرگەۋ امالدارى جۇرگىزىلىپ جاتىر. ءبارى زاڭ شەڭبەرىندە شەشىلەتىن بولادى. تۇسىنىستىكپەن قاراۋلارىڭىزدى سۇرايمىن»، -دەدى داۋلەت تۇرلىحانوۆ ۇندەۋىندە.
ر/S: سوت نۇراسىل بولاتتى اقبتك-نىڭ 652-بابىنىڭ 6-بولىگىندە كوزدەلگەن اكىمشىلىك قۇقىق بۇزۋشىلىقتى جاساعانى ءۇشىن كىنالى دەپ تانىدى. ول 15 تاۋلىككە قاماۋعا الىندى.
سوت ۇكىمى زاڭدى كۇشىنە ەنگەن جوق.