استانا قالاسىنىڭ سالىنۋى تاۋەلسىز قازاقستاننىڭ تاريحىندا ايرىقشا ءمانى بار وقيعا بولدى. وزدەرىڭىزگە ءمالىم، ەلوردانى كوشىرۋ وڭاي بولعان جوق. اۋقىمدى جۇمىس ىستەلدى. بۇل شەشىم وتە كۇردەلى كەزەڭدە قابىلداندى. ەل ەكونوميكاسى توقىراۋدا بولدى. جۇرت نارىقتىق قاتىناستارعا تولىق بەيىمدەلمەگەن كەز ەدى، - دەدى توقايەۆ.
پرەزيدەنت اتاپ وتكەندەي، وسىنداي قيىن جاعدايدا جوعارى كەڭەس، تۇڭعىش پرەزيدەنت نۇرسۇلتان ءابىش ۇلى نازاربايەۆتىڭ باستاماسى بويىنشا استانانى اقمولاعا اۋىستىرۋ تۋرالى شەشىمدى 1994 جىلى 6 شىلدەدە قابىلدادى، -دەپ جازدى BAQ.KZ.
باس قالامىز رەسمي تۇردە 1997 جىلى 10 جەلتوقساندا كوشىرىلدى. ال وسىدان 25 جىل بۇرىن 6 مامىردا اقمولا اتاۋى استانا بولىپ وزگەرتىلدى. ەلوردانىڭ جىلناماسى تاۋەلسىز قازاقستاننىڭ شەجىرەسىمەن تىعىز استاسىپ جاتىر. شىن مانىندە، استانانى كوشىرۋ گەوساياسي تۇرعىدان وتە دۇرىس قادام بولدى، - دەپ ايتتى مەملەكەت باسشىسى.
ايتۋىنشا، بۇل حالقىمىزدىڭ بولاشاق تاعدىرىن ايقىنداعان اسا ماڭىزدى جانە جەر كەزىندە قابىلداعان كاسىبي شەشىم بولدى.
تۇڭعىش پرەزيدەنتتىڭ وسى باستاماسى جالپى ۇلتتىق يدەياعا اينالدى. بۇل شەشىم ەلىمىزدىڭ، حالقىمىزدىڭ ۇلتتىق مۇددەسىنە ساي كەلگەنىنە ەشقانداي كۇمان جوق. سوندىقتان ءبارىمىز نۇرسۇلتان ءابىش ۇلى نازاربايەۆتىڭ بۇل سالاداعى ەڭبەگىنە لايىقتى، ءادىل باعا بەرۋىمىز كەرەك، - دەدى توقايەۆ.
پرەزيدەنتتىڭ ايتۋىنشا، ادىلەتتى قازاقستاندا اقتى اق، قارانى قارا دەۋ قاجەت، باسقا سوزبەن ايتقاندا، نەنىڭ شىندىق، نەنىڭ وتىرىك ەكەنىن اجىراتا ءبىلۋ كەرەك. بۇل – ەلىمىزدىڭ بولاشاعىنا تىكەلەي قاتىسى بار ماسەلە.