تەاتر گاردەروبتان باستالاتىنى سياقتى، ادامنىڭ مادەنيەتىن دە ونىڭ تازالىققا دەگەن كوزقاراسى ايقىندايدى، دەپ ەسەپتەيدى «الاتاۋ» ءداستۇرلى ونەر تەاترىنىڭ ارتىستەرى.
بۇگىن الاتاۋ اۋدانىنداعى كەشەندى سەنبىلىك اياسىندا ساين مەن مومىش ۇلى كوشەلەرىنىڭ اراسىندا ورنالاسقان موڭكە بي سكۆەرى تازارتىلدى. تەاتر ۇجىمى مەن اۋدان اكىمدىگى وكىلدەرى سەنبىلىككە جۇمىلا كىرىستى.
سەنبىلىككە قاتىسۋشىلار جۇمىسقا كوتەرىڭكى كوڭىل-كۇيمەن ىنتالانا كىرىستى.
– بۇگىنگى سەنبىلىك اياسىندا اعاشتاردىڭ سانيتارلىق قىرقىلۋى دا جۇرگىزىلۋدە. ءبىز بۇل شاراعا «الاتاۋ» تەاترىنىڭ قىزمەتكەرلەرىن ارنايى شاقىردىق. سونىمەن قاتار، سەنبىلىككە قولعاپ، بوياۋ، سىپىرعىش سياقتى قاجەتتى قۇرالداردى ۇسىنعان مەردىگەر ۇيىمدار دا اتسالىسۋدا. مۇنداي ەكولوگيالىق اكسيالار اۋدانىمىز ءۇشىن وتە ماڭىزدى، – دەدى الاتاۋ اۋدانى اباتتاندىرۋ ءبولىمىنىڭ باس مامانى ماديار ابۋيەۆ.
تەاتر ارتىستەرى ساناۋلى ساعات ىشىندە ۇلكەن جۇمىس اتقاردى: ورىندىقتاردى بويادى، اعاشتاردى اكتەدى، قورشاۋلاردى جۋىپ، قىسقى سۋىقتان ساقتاعان جاپىراقتاردى جيناپ، سكۆەردى مۇقيات تازالادى.
– «الماتى – ءبىزدىڭ ورتاق ءۇيىمىز» سياقتى كەرەمەت اكسيانىڭ ارقاسىندا ءبىز قالامىزدى تازا ۇستاپ، ونى اباتتاندىرۋعا ءوز ۇلەسىمىزدى قوسامىز. قالا تۇرعىندارى سەنبىلىكتەرگە قۋانا قاتىسادى – اعاش وتىرعىزىپ، كوشەلەردى تازارتادى. بارشا الماتىلىقتاردى وسى اكسياعا قوسىلىپ، ازاماتتىق بورىشىن ورىنداۋعا شاقىرامىن، – دەدى «الاتاۋ» ءداستۇرلى ونەر تەاترىنىڭ ءارتىسى اياۋلىم قۇنانباي.
سونىمەن قاتار، سەنبىلىك بارىسىندا سكۆەر بويىنداعى اعاشتار سانيتارلىق قىرقۋدان ءوتتى.
– رەسپۋبليكالىق «تازا قازاقستان» اكسياسى بيىل ەكىنشى جىل قاتارىنان ءوتىپ جاتىر. بۇل باستاما ەلىمىز بەن قالامىز ءۇشىن اسا ماڭىزدى، سەبەبى ەكولوگيالىق ماسەلە بۇگىندە الەم بويىنشا ءبىرىنشى كەزەكتە تۇر. ەگەر ءبىز قورشاعان ورتاعا ۇقىپتىلىقپەن قاراماساق، وندا سۇيىكتى قالامىز قالاي گۇلدەنبەك؟ قالانى تازا ۇستاۋ – ءاربىر ازاماتتىڭ مىندەتى دەپ سانايمىن. قالادا تاربيەگە قاتىستى پروبلەمالار بار – مىسالى، ادامدار تاۋعا بارعان سوڭ قوقىسىن جيناماي كەتەدى. وكىنىشكە قاراي، كولىكتەن قوقىس لاقتىراتىندار دا، جول بويىنا تۇكىرەتىندەر دە بار. بۇل – مادەنيەت دەڭگەيىنىڭ تومەندىگىن كورسەتەدى. وسىنداي ءىس-شارالار ارقىلى ءبىز تەك تۇرعىنداردى تاربيەلەپ قويماي، ءوزىمىزدى دە تازالىققا باۋليمىز. مادەنيەت وسىنداي كىشكەنتاي قادامداردان باستالادى. سوندىقتان مۇنداي اكسيالار وتە ماڭىزدى جانە قاجەت، – دەدى قازاقستاننىڭ ەڭبەك سىڭىرگەن قايراتكەرى، «الاتاۋ» ءداستۇرلى ونەر تەاترىنىڭ دامۋ جونىندەگى ديرەكتور ورىنباسارى قاراگوز سۇلەيمەنوۆا.
ايتا كەتەيىك، الماتىدا كوكتەمگى «الماتى – ءبىزدىڭ ورتاق ءۇيىمىز» اتتى تازالىق ناۋقانى رەسپۋبليكالىق «تازا قازاقستان» اكسياسى اياسىندا بيىلعى ءساۋىر ايىنا دەيىن جالعاسادى.