قازاقستان رەسپۋبليكاسىنىڭ توتەنشە جاعدايلار ءمينيسترى (تجم) شىڭعىس ءارىنوۆ الماتىعا جانە الماتى وبلىسىنا جۇمىس ساپارى بارىسىندا «تازا قازاقستان» اكسياسىنا قاتىستى. بۇل تۋرالى Aqshamnews.kz سايتى حابارلايدى.
مينيستر الماتى قالاسىنداعى رايىمبەك داڭعىلىندا ورنالاسقان №8 ءورت ءسوندىرۋ بولىمىنە بارىپ، ونىڭ جاڭارتىلعان ينفراقۇرىلىمىمەن تانىستى. بۇل ءبولىم – الماتىداعى ەڭ كونە نىسانداردىڭ ءبىرى، ول المالى جانە جەتىسۋ اۋداندارىنا قىزمەت كورسەتەدى.
وتكەن جىلدان بەرى №8 ءورت ءسوندىرۋ بولىمىندە اۋقىمدى جوندەۋ جۇمىستارى جۇرگىزىلدى. نىساننىڭ ينجەنەرلىك جۇيەلەرى – سۋ قۇبىرى، ەلەكترمەن جابدىقتاۋ، كارىز جانە جەلدەتۋ جابدىقتارى تولىقتاي جاڭارتىلدى. مۇنداي وزگەرىستەر عيماراتتىڭ قاۋىپسىزدىگى مەن قىزمەتكەرلەردىڭ ەڭبەك جاعدايىن جاقسارتۋعا باعىتتالعان.
گەنەرال-مايور شىڭعىس ءارىنوۆ ءورت سوندىرۋشىلەرگە ارنايى سپورتتىق الاڭدى سىيعا تارتتى. بۇل الاڭدا قىزمەتكەرلەر جاتتىعىپ، دەنە دايىندىعىن ارتتىرا الادى.
– ينفراقۇرىلىمدى جاڭارتۋ – جاي عانا جاعدايدى جاقسارتۋ ەمەس، سونىمەن قاتار قالا تۇرعىندارىنىڭ قاۋىپسىزدىگىن ارتتىرۋعا مۇمكىندىك بەرەدى. قازىرگى زامانعى جابدىقتار توتەنشە جاعدايلارعا جەدەل ارەكەت ەتۋگە جانە ءورت سوندىرۋشىلەردىڭ جۇمىسىن وڭتايلاندىرۋعا كومەكتەسەدى، – دەدى مينيستر.
جاڭارتىلعان ءورت ءسوندىرۋ ءبولىمىن ارالاپ شىققان سوڭ، شىڭعىس ءارىنوۆ «تازا قازاقستان» ەكولوگيالىق اكسياسىنا قاتىسىپ، بولىمشەنىڭ اۋماعىنا شىرشا كوشەتتەرىن وتىرعىزدى.
– ءبىز مۇنداي ەكولوگيالىق شارالارعا ءاردايىم قۋانا قاتىسامىز. وتكەن جىلى استانادا ەكى مىڭنان استام قىلقان جاپىراقتى اعاش وتىرعىزىلدى. بۇل ءبىر رەتتىك اكسيا ەمەس – ول تۇراقتى ەكولوگيالىق باستامالارىمىزدىڭ ءبىر بولىگى. الماتىدا وتىرعىزىلعان كوشەتتەر – ءبىزدىڭ ءىسىمىزدىڭ سيمۆولدىق باستاۋى، جانە ول ءارى قاراي جالعاسىن تاباتىنىنا سەنىمدىمىن، – دەدى مينيستر.
بۇل شارا تەك جاسىل جەلەكتى كوبەيتۋگە عانا ەمەس، سونىمەن قاتار تجم قىزمەتكەرلەرىنىڭ قورشاعان ورتاعا دەگەن جاۋاپكەرشىلىگىن ارتتىرۋعا باعىتتالعان. الماتىلىق ءورت سوندىرۋشىلەر وزدەرىنىڭ جۇمىس ورىندارىنىڭ ماڭىن تازا ۇستاۋ جانە اباتتاندىرۋعا ەرەكشە كوڭىل بولۋدە.
شىڭعىس ءارىنوۆتىڭ الماتىعا ساپارى توتەنشە جاعدايلار قىزمەتىنىڭ دامۋىنا جانە ەكولوگيالىق ماسەلەلەرگە كوڭىل ءبولۋدىڭ ماڭىزدىلىعىن تاعى ءبىر مارتە كورسەتتى. ءورت ءسوندىرۋ ءبولىمىنىڭ جاڭارۋى مەن جاسىل جەلەكتەردى وتىرعىزۋ – قالانىڭ قاۋىپسىزدىگىن قامتاماسىز ەتۋدە جانە ەكولوگيالىق احۋالدى جاقسارتۋدا ماڭىزدى قادامدار.