لوس-اندجەلەستە قازاق ءتىلى ورتالىعى اشىلدى

اقش-تا قازاق مادەني ورتالىعى جۇمىس ىستەي باستادى

ورتالىقتا ءقازىر 20-دان استام بالا ءتالىم الادى. ولاردىڭ دەنى 5-13 جاس ارالىعىنداعىلار. سونداي-اق ۇستازدار بالعىندارعا انا ءتىلىن ۇيرەتىپ قانا قويماي، ولاردى قازاق حالقىنىڭ سالت-داستۇرلەرى، مادەنيەتى مەن ونەرىمەن جاقىن تانىستىرادى، دەپ حابارلايدى Almaty-akshamy.kz

«5 جاسىنان باستاپ اعىلشىن مەكتەبىنە بارعاندىقتان، كەيبىر بالالار اعىلشىن تىلىندە سويلەپ قانا قويماي، ويلاۋى دا مۇمكىن. سوندىقتان ءبىز اپتاسىنا ءبىر مەزگىل قازاقتىڭ ءتىلىن، مادەنيەتىن ۇمىتپاسا ەكەن دەپ ساباق وتكىزەمىز. مەن ءبىزدىڭ بالالارمەن ماقتانامىن. سەبەبى ولار قايدا جۇرسە دە قازاقشا سويلەپ، قازاق ەكەندەرىن ماقتانىش تۇتادى»، - فيلولوگ قارلىعاش شىنىبايەۆا. 

ورتالىق ديرەكتورىنىڭ ايتۋىنشا، جوبا ءبىرىنشى كەزەكتە شەتەلدە تۇراتىن قازاقتاردى بىرىكتىرۋ ءۇشىن قولعا الىندى. يدەيا اسىرەسە اتا-انالار اراسىندا كەڭ قولداۋعا يە بولدى.

«جاستار نەمەسە ەرەسەك ادامدار كەلىپ، وسى جەردەگى قازاقتارعا ءتىل ۇيرەتكىسى كەلسە، ەسىگىمىز اشىق. بۇل قازاقتاردىڭ ءبىر-بىرىن قولداۋى ءۇشىن ماڭىزدى»،- كاليفورنياداعى قازاق ورتالىعىنىڭ ديرەكتورى راۋشان مۇحتار. 

الداعى ۋاقىتتا وزگە باعىتتاعى ۇيىرمەلەردى دە اشۋ جوسپارى بار.