لوندوندا الماتىلىق سۋرەتشىنىڭ كورمەسى ءوتتى

اۆتوردىڭ ءتول مادەنيەتىنە وتە جاقىن ەكەندىگىن جانە ونى جوعارى باعالايتىنىن انىق اڭعارۋعا بولادى

لوندوندا الماتىلىق سۋرەتشى ايعانا عاليدىڭ كورمەسى ۇيىمداستىرىلدى. اۆتور ابستراكسيا ستيلىندە سالىنعان سۋرەتتەرىنىڭ جاڭا توپتاماسىن جارىق تاقىرىبىمەن بايلانىستىرعان، دەپ حابارلايدى Almaty-akshamy.kz اikyn.kz-كە سىلتەمە جاساپ.

جارقىراعان شارلار، يمپۋلستىك ەلەكتر اعىندارى، سارى ساۋلەلەر – مۇنىڭ ءبارى ايعانا ءعاليدىڭ سۋرەتتەرىندە كورىنىس تاپقان. اۆتور ءوز ەڭبەكتەرىندە جارىقپەن شاعىلىسىپ، ءارتۇرلى كەيىپكە ەنگەن زاتتاردى بەينەلەۋگە تىرىسقان. «كارتينالار مۇلدەم باسقا تىلدە سويلەيدى. كۆانتتىق فيزيكا نەمەسە كوسمولوگيا ءتىلى مە دەرسىڭ»، – دەيدى ساراپشىلار.

ايعانا سۋرەتتەرىنە ۇلتتىق رەڭ بەرىپ، كارتينالارىن «شاڭقوبىز»، «كيىز ءۇي»، «قوسىن» جانە «ورنەك» دەپ اتاعان.

«اۆتوردىڭ ءتول مادەنيەتىنە وتە جاقىن ەكەندىگىن جانە ونى جوعارى باعالايتىنىن انىق اڭعارۋعا بولادى. ول كوپتەگەن جۇمىسى ارقىلى ۇلى دالادان باستاۋ الاتىن تاڭىرشىلدىك يدەياسىن جەتكىزۋگە تىرىسقان. ءبىراق ونىڭ شىعارماشىلىعىنىڭ دىنگە ەش قاتىسى جوق، ابستراكتىلىك ونەر دەپ باعالار ەدىم»، – دەيدى كورمە كۋراتورى، ساراپشى نيكو كوس ەرل.

ايعانا عالي ءوز شىعارماشىلىعىندا كەنەپ پەن قاعازدان باستاپ، توقىما مەن قولاعا دەيىن پايدالانادى. سۋرەتشى – الماتى قالاسىنىڭ تۋماسى. ايعانا الەمنىڭ تۇكپىر-تۇكپىرىندە كورمەلەر وتكىزىپ، تۋىندىلارى ارقىلى حالقىمىزدىڭ باي مادەني مۇراسىن ناسيحاتتاپ ءجۇر.