88 جاستاعى ارداگەر اۋەزوۆ اۋدانىندا تۇرادى.
الماپتى قالاسىنىڭ VIII شاقىرىلعان ءماسليحاتىنىڭ كەزەكتى XV سەسسياسىندا «لەنينگراد قالاسىنىڭ كاسىپورىندارىندا، مەكەمەلەرى مەن ۇيىمدارىندا بلوكادا كەزەڭىندە جۇمىس ىستەگەن جانە «لەنينگرادتى قورعاعانى ءۇشىن» مەدالىمەن نەمەسە «لەنينگراد بلوكاداسىنىڭ تۇرعىنى» توسبەلگىسىمەن ناگرادتالعان الماتى قالاسىندا تۇراتىن ازاماتتارعا سانكت-پەتەربۋرگ قالاسىنا جول ءجۇرۋ شىعىندارىن وتەۋگە الەۋمەتتىك كومەك تۋرالى شەشىمگە وزگەرىستەر قابىلداندى.
قالالىق جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى باۋىرجان جاۋباسوۆتىڭ ايتۋىنشا، الماتىدا وسى تالاپتارعا ساي كەلەتىن ءبىر عانا ارداگەر تۇرادى.
وزگەرىستەر مەملەكەتتىك باسقارۋ جۇيەسىن ورتالىقسىزداندىرۋمەن جانە الەۋمەتتىك كومەك كورسەتۋ جونىندەگى فۋنكسيالاردى الماتى قالاسى اۋداندارىنىڭ اكىمدىكتەرىنە بەرۋمەن بايلانىستى.
«ۇوس ارداگەرلەرىنىڭ سانكت-پەتەربۋرگ قالاسىنا بارۋىن قامتاماسىز ەتۋ بويىنشا الەۋمەتتىك كومەك كورسەتۋ ءتارتىبىن ايقىندايتىن ءماسليحات شەشىمىنە ناقتىلاۋ ەنگىزۋ قاجەت. ءتيىستى وزگەرىس تولەمدەر ەكىنشى دەڭگەيدەگى بانكتەر ءارى اۋدان اكىمدىكتەرى ارقىلى ۇوس ارداگەرىنىڭ شوتىنا تىكەلەي جۇرگىزىلەتىنىن قاراستىرادى. بۇگىندە بۇل اۋەزوۆ اۋدانى. جالپى، قوسىمشا قارجى قاجەت ەمەس، ءبىز ورتالىقسىزداندىرۋ شارالارىنا سايكەس كەلتىرەمىز»، - دەپ اتاپ ءوتتى باسقارما باسشىسى.
«الماتىدا جىل سايىن سانكت-پەتەربۋرگكە بارىپ، تۋىستارىمەن كەزدەسىپ، ەستەلىك ورىنداردا بولاتىن ءبىر عانا ارداگەر بار. بۇل ساپارعا شامامەن 300 مىڭ تەڭگە بولىنەدى، تولىق كولەمدە تولەنەدى، قاراجات قاراستىرىلعان»، - دەپ قورىتىندىلادى ءسوزىن باۋىرجان جاۋباسوۆ.