لاتىن امەريكاسىن «جاۋلاعان» ديماش

"When I’ve Got You" اتتى جاڭا ءانى العاش رەت شىرقالدى.

ديماشتىڭ ءانىن قويعان "Andromeda" راديوستانسياسى رەكوردتىق كورسەتكىشكە جەتتى، دەپ حابارلايدى Almaty-akshamy.kz

ونىڭ اندەرى العاش رەت 7 اقپاندا مەكسيكا راديوسىنان شىرقالعان. 28 اقپاندا لاتىن امەريكاسىنىڭ "Andromeda" راديوستانسياسىنىڭ "ديماشتىڭ عالامى" باعدارلاماسىندا قازاقستاندىق ونەرپازدىڭ "When I’ve Got You" اتتى جاڭا ءانى العاش رەت شىرقالدى.

تىڭداۋشىلارعا شىعارما ۇناعانى سونشا، ولار راديوجۇرگىزۋشىلەردەن ونى قايتا قويۋىن وتىنگەن.

Universo Dimash ("ديماشتىڭ عالامى") باعدارلاماسى 2023 جىلدىڭ 1 ناۋرىزىندا قازاقستاندا العىس ايتۋ كۇنى مەن ناۋرىز مەيرامىنىڭ قارساڭىنا وراي ەفيرگە شىققان ەدى.

ەفيردىڭ تىڭداۋشىلار اراسىندا ۇلكەن تولقۋ مەن سۇرانىس تۋدىرعانى سونشا، Andromeda Radio جۇرگىزۋشىلەرى تولىعىمەن قازاقستاندىق ورىنداۋشىنىڭ شىعارماشىلىعىنا ارنالعان جاڭا باعدارلاما جاساۋدى ۇيعاردى. "ديماشتىڭ عالامى" اتتى باعدارلاما قۇرىلعاننان بەرى ەفيردە 14 ەپيزود جارىق كوردى.

28 اقپان كۇنگى راديوستانسيادا قازاقستاندىق ونەرپاز ديماش قۇدايبەرگەننىڭ كوپتەگەن تۋىندىلارىنىڭ شىعۋ تاريحى باياندالىپ، اندەرى شىرقالدى. تىڭدارماندار "When I’ve Got You" جاڭا ءانىنىڭ تۇساۋكەسەرىنەن ءلاززات الىپ، سونداي-اق: Battle of Memories، Neverland، War and Peace، Our Love، Be Happy، The meaning of eternity، Restart my love، The Crown جانە ت.ب. جۇڭگو اندەرىن ەرەكشە اسەرمەن تىڭدادى.