قازاقستان تاراپىنان شاحمات، سنوۋبورد جانە شاڭعى جارىسىنا 26 سپورتشى قاتىسادى.
2ء-شى ناۋرىزدا تۇركيانىڭ ەرزۋرۋم قالاسىندا XX-شى قىسقى سۋردليمپيادا ويىندارى باستالدى، دەپ حابارلايدى Almaty-akshamy.kz
ءدۇبىرلى دوداعا 36 مەملەكەتتەن 1000-عا جۋىق سپورتشى قاتىسادى. جارىستا تاۋ شاڭعىسى، سنوۋبورد، شاڭعى جارىسى، شاحمات، فۋتزال جانە كەرلينگ سپورت تۇرلەرىنەن 34 كومپلەكت مەدال ويناتىلادى.
«بيىل قازاقستان رەسپۋبليكاسى قىسقى سۋردليمپيادا ويىندارىنا وسىمەن ءۇشىنشى مارتە قاتىسقالى وتىر. سپورتشىلارىمىز جارىستىڭ الدىندا ششۋچينسك جانە الماتى وبلىسىندا وقۋ-جاتتىعۋ جيىندارىنان ءوتىپ، قىسقى ويىندارعا تىڭعىلىقتى دايىندىقپەن كەلدى. ۇلتتىق قۇراما ءۇشىن العاشقى سايىس ەرتەن بليس شاحماتتان جانە شاڭعى جارىسىنان باستالادى. سپورتشىلارىمىز اتالمىش دودادا لايىقتى ونەر كورسەتىپ، ەل قورجىنىن سۋردليمپيادا ويىندارىنىڭ مەدالىمەن تولىقتىرادى دەپ سەنەمىن»،- دەدى دەنە مۇمكىندىكتەرى شەكتەۋلى تۇلعالارعا ارنالعان سپورتتىق دايارلاۋ ورتالىعىنىڭ ديرەكتورىنىڭ ورىنباسارى ءومىرزاقوۆ ءادىلحان بولاتحان ۇلى.
اشىلۋ سالتاناتى 2024 جىلعى قىسقى سۋردليمپيادا ويىندارى رەسمي تۇردە باستالعانىن بىلدىرەدى. سالتاناتتى شارادا ەلىمىزدىڭ تۋىن شاحماتتان الەم چەمپيوناتىنىڭ قولا جۇلدەگەرى سۇلتان قوجاحمەتوۆ ۇستاپ شىقتى.
«بۇل مەنىڭ العاشقى سۋردليمپيادا ويىندارىم. وسىنداي ۇلكەن جارىستا ەلىمىزدىڭ تۋىن ۇستاپ شىعۋ مەن ءۇشىن مارتەبە. سەنىم ارتقان سپورت كوميتەتىنە، دەنە مۇمكىندىكتەرى شەكتەۋلى تۇلعالارعا ارنالعان سپورتتىق دايارلاۋ ورتالىعىنا، ۇلتتىق سۋردليمپيادا كوميتەتىنە جانە بارلىق قازاقستاندىقتارعا العىسىمدى سوزبەن ەمەس، ىسپەن دالەلدەۋگە تىرىسامىن»، - دەدى سۇلتان قوجاحمەتوۆ.
ايتا كەتسەك، سۋردليمپيادا ويىندارىنا ەستۋ قابىلەتى زاقىمدانعان سپورتشىلار قاتىسادى. جارىس الدىندا سپورتشىلار اۋديوگراممادان ءوتىپ، قويىلعان تالاپتارعا ساي كەلەتىندىگىن دالەلدەۋ قاجەت. قىسقى ويىندار 12 ناۋرىزعا دەيىن سوزىلادى.