جانبوتا تۇرعان باسپانانى لاي تولىق شايىپ كەتكەن
15 مامىر تۇسكى ساعات 12-دەن اسقان ۋاقىت، تەكەلى قالاسىنداعى قونايەۆ كوشەسىن ءبىر ساتتە لاي كوشكىنى باسىپ قالدى. شاھاردىڭ كەلبەتىنە نۇقسان كەلگەنى بىلاي تۇرسىن، ءبۇتىن ءبىر وتباسىنىڭ شام-شىراعى جانباي جاتىپ ءسوندى. بۇگىن كىشكەنتاي پەرىشتەنىڭ مۇردەسىن تەكەلى جۇرتشىلىعى جەر قوينىنا تاپسىردى، دەپ حابارلايدى Almaty-akshamy.kz.
مارقۇم، سىرىمبەت اۋىلىنا جەرلەندى.
تابيعي اپاتتىڭ سالدارىنان ءۇيدىڭ ءسۇت كەنجەسى جانبوتا تىلەۋحانوۆا كوز جۇمدى. 5 جاسار ويىن بالاسى، لاي كوشكىنى شايىپ
كەتكەن ءۇيىندىنىڭ استىندا قالعان. بالانىڭ دەنەسىن ەرىكتىلەر مەن قۇتقارۋشىلار جابىلىپ ىزدەگەنىمەن 6 ساعاتتان سوڭ الماتى وبلىسى تجد «باگيرا» اتتى قىزمەتتىك يت تاۋىپ بەرگەن بولاتىن. قاپيادا ءبىر قارلىعاش ماڭگى مەكەنىنە قانات قاعىپ كەتە باردى، ارتىندا بوتام-اي، دەپ اتا-اناسى مەن 12 جاسار اپكەسى قالدى.
ەستەرىڭىزگە سالامىز، تولاسسىز جاۋعان جاڭبىر سالدارىنان تاۋ كوشكىنى ورىن الىپ، ارتى لايعا اينالعان. ناتيجەسىندە 5 بىردەي ءۇي بۇلىنگەن، سونىڭ ىشىندە جانبوتا تۇرعان باسپانانى لاي تولىق شايىپ كەتكەن ەدى. بۇگىندە بولاشاعىن ءان الەمىمەن بايلانىستىرعىسى كەلگەن ءبۇلدىرشىن دە، ءبىراز جىل پانا بولعان ءۇيدىڭ دە ورنى جوق.
تەكەلى قالاسىنىڭ باسشىلىعى الداعى تاڭدا اپاتتىڭ كەسىرىنەن ءۇيسىز قالعان وتباسىلارعا كومەك كورسەتەتىنىن جەتكىزۋدە.
«بىزدە ءقازىر 4 ءۇي بۇزىلىپ تۇر. ونىڭ تەحنيكالىق جاعدايىن كوردىك. ءۇيدى ساتىپ بەرەمىز با، سالامىز با زاڭعا سايكەس، كوميسسيانىڭ شەشىمىنە قاراي قاراستىرامىز»،- دەدى تەكەلى قالاسىنىڭ اكىمى باتىر مولداحمەتوۆ.
جەرگىلىكتى اكىمدىك جانبوتاسىن جوقتاپ وتىرعان جانۇيانى باسپانامەن قامتاماسىز ەتەمىز دەيدى. الايدا، ەندىگى جەردە اكە مەن انانىڭ، اپكەنىڭ كوڭىلىندەگى قاياۋ مەن وكىنىشى سەيىلمەسى انىق. بۇدان بىلاي ۇيلەرىندە جانىنىڭ جالاۋىنا اينالعان جانبوتانىڭ جارقىن داۋسى ەستىلمەيدى.
قازىرگى كەزدە، كوشكىننەن بۇلىنگەن قالا كەلبەتىن قالپىنا كەلتىرۋ جۇمىسى جۇرگىزىلۋدە. ول ءۇشىن ق ر تجم 28237 اسكەري ءبولىمىنىڭ 100 قىزمەتكەرى مەن 7 بىرلىك تەحنيكا جۇمىلدىرىلعان. 16 مامىرداعى جاعداي بويىنشا 890 تەكشە مەتر بالشىق شىعارىلىپ، 81 رەيس جاسالىنعان. قازىرگى تاڭدا قونايەۆ كوشەسى لايدان تازارتىلدى. قالپىنا كەلتىرۋ جۇمىستارى 1-2 كۇندە اياقتالادى دەپ كۇتىلۋدە.
حوش، قالانىڭ كەلبەتى قالپىنا كەلەر. ال، قىزعالداعىنان كوز جازعان وتباسى قالىپتى ومىرىنە ورالا الادى ما؟ قايتكەنمەن، ءبىر ءۇيدىڭ ءبىر شىراعى قايتادان جانبايدى.